ఐసీసీ టెస్ట్ ర్యాంకింగ్స్: పాయింట్లలో స్మిత్ పైపైకి, కోహ్లి కిందకు

ఐసీసీ తాజాగా ప్రకటించిన టెస్ట్ బ్యాట్స్‌మెన్ ర్యాంకింగ్స్‌లో ఆసీస్ కెప్టెన్ స్టీవ్ స్మిత్ అగ్రస్థానంలో కొనసాగుతున్నాడు. తర్వాతి స్థానంలో విరాట్ కోహ్లి ఉన్నాడు. గతంలో ప్రకటించిన టెస్టు ర్యాంకింగ్స్‌లోనూ వీరిద్దరూ తొలి రెండు స్థానాల్లోనే ఉన్నప్పటికీ.. పుణె టెస్టు తర్వాత ఇద్దరి మధ్య పాయింట్లలో వ్యత్యాసం బాగా పెరిగింది. పుణె టెస్టులో సెంచరీ సాధించిన స్టీవ్ స్మిత్.. ఆరు పాయింట్లను మెరుగు పర్చుకోగా.. కోహ్లి మాత్రం 22 పాయింట్లను చేజార్చుకున్నాడు. గతంలో స్మిత్ ఖాతాలో 933 పాయింట్లు ఉండగా.. ఇప్పుడవి 939కి చేరాయి. అదే సమయంలో కోహ్లి పాయింట్లు 895 నుంచి 873కి తగ్గిపోయాయి.

స్మిత్, కోహ్లి మధ్య 66 పాయింట్ల తేడా ఉండగా. మూడోస్థానంలో ఉన్న ఇంగ్లండ్ బ్యాట్స్‌మెన్ జో రూట్, స్మిత్ మధ్య 91 పాయింట్ల తేడా ఉంది. నాలుగో స్థానంలో కివీస్ కెప్టెన్ కేన్ విలియమ్సన్ 823 పాయింట్లతో కొనసాగుతున్నాడు.

BREAKING: @stevesmith49 has stormed clear at the top of the @MRFWorldwide ICC Player Rankings for Test Batsmen!https://t.co/F3JbQ9BMUJ pic.twitter.com/YMKMN5JlV7 — ICC (@ICC) February 26, 2017
గతంలో సచిన్ టెండుల్కర్ 898 పాయింట్లను సాధించగా.. తాజాగా ఐసీసీ ర్యాంకింగ్స్ ప్రకటించక ముందు 895 పాయింట్లు సాధించిన కోహ్లి మరో మూడు పాయింట్లు మెరుగుపర్చుకుంటే... సచిన్‌ను చేరుకునే వీలుండేది. కానీ పుణె టెస్టులో 13 పరుగులు మాత్రమే చేసిన విరాట్ పాయింట్లను భారీగా కోల్పోయాడు. భారత గడ్డపై ఒక టెస్టులో కోహ్లికి ఇదే అత్యల్ప స్కోరు (రెండు ఇన్నింగ్స్‌లోనూ బ్యాటింగ్ చేసిన సందర్భంలో) కావడం బాధాకరం. టెస్టుల్లో అత్యధిక పాయింట్లు సాధించిన ఆసియా ఆటగాళ్ల జాబితాలో సంగక్కర 938 పాయింట్లతో అగ్రస్థానంలో ఉండగా, పాక్ ప్లేయర్ మహ్మద్ యూసుఫ్ (933), సునీల్ గావస్కర్ (916), సచిన్ (898) తర్వాతి స్థానాల్లో ఉన్నారు.

ఇప్పటికైతే కోహ్లి సచిన్ రికార్డును మిస్ కాగా.. పుణెలో సెంచరీతో ఆకట్టుకున్న స్మిత్.. టెస్టు క్రికెట్ చరిత్రలోనే అత్యధిక రేటింగ్ పాయింట్లు సాధించిన బ్యాట్స్‌మెన్ల జాబితాలో ఆరోస్థానానికి చేరుకున్నాడు. గ్యారీ సోబర్స్, వివియన్ రిచర్డ్స్, సంగక్కర లాంటి ఆటగాళ్లను స్మిత్ అధిగమించాడు. అత్యధిక రేటింగ్ పాయింట్లు సాధించిన ఆల్‌టైం టెస్టు ప్లేయర్ల జాబితాలో బ్రాడ్‌మెన్ (961) తొలిస్థానంలో ఉండగా, హట్టన్ (945), జాక్ హబ్స్ (942), పాంటింగ్ (942), పీటర్ మే (941) తర్వాతి స్థానాల్లో ఉన్నారు. పాంటింగ్, బ్రాడ్‌మెన్ ఆసీస్ ప్లేయర్లు కాగా, మిగతావారు ఇంగ్లండ్‌కు ఆడిన వారు కావడం విశేషం.