టీ20 వరల్డ్‌కప్‌లో లంకపై భారత్ ఘనవిజయం

ఆస్ట్రేలియా గడ్డపై జరుగుతున్న మహిళల టీ20 ప్రపంచకప్‌లో భారత్ వరుస విజయాలతో దూసుకెళ్తోంది. ఇప్పటికే టోర్నీలో సెమీస్ బెర్తుని ఖాయం చేసుకున్న భారత్ జట్టు.. ఈరోజు శ్రీలంకతో మెల్‌బోర్న్ వేదికగా జరిగిన నామమాత్రపు మ్యాచ్‌లో 7 వికెట్ల తేడాతో అలవోక విజయాన్ని అందుకుంది. దీంతో.. గ్రూప్-ఎలో ఆడిన అన్ని మ్యాచ్‌ల్లోనూ గెలిచిన ఏకైక జట్టుగా నిలవడంతో పాటు పట్టికలోనూ అగ్రస్థానాన్ని సుస్థిరం చేసుకుంది.

ఈరోజు మ్యాచ్‌లో టాస్ గెలిచి తొలుత బ్యాటింగ్ చేసిన శ్రీలంక జట్టు నిర్ణీత 20 ఓవర్లలో 9 వికెట్ల నష్టానికి 113 పరుగులే చేయగలిగింది. భారత అగ్రశ్రేణి బౌలర్ రాధ యాదవ్ (4/23) దెబ్బకి వరుస వికెట్లు చేజార్చుకున్న ఆ జట్టు ఇంకా తక్కువ స్కోరుకే పరిమితమయ్యేలా కనిపించింది. కానీ.. ఆఖర్లో కవిశా దిహారి (25: 16 బంతుల్లో 2x4) భారత బౌలర్లకి ఎదురునిలిచి ఆ జట్టు పరువు నిలిపింది. ఆ జట్టులో ఓపెనర్ చమారి ఆటపట్టు (33: 24 బంతుల్లో 5x4, 1x6) టాప్ స్కోరర్‌గా నిలిచింది.

114 పరుగుల లక్ష్యఛేదనలో భారత్‌కి ఓపెనర్లు మంధాన (17: 12 బంతుల్లో 3x4), షపాలి వర్మ (47: 37 బంతుల్లో 7x4, 1x6) మెరుపు ఆరంభాన్నిచ్చారు. ఆ తర్వాత వచ్చిన హర్మన్‌ప్రీత్ కౌర్ (15: 14 బంతుల్లో 2x4, 1x6), జెమీమా (15 నాటౌట్: 15 బంతుల్లో 1x4), దీప్తి శర్మ (15 నాటౌట్: 13 బంతుల్లో 2x4) కూడా దూకుడుగా ఆడేశారు. దీంతో.. కేవలం 14.4 ఓవర్లలోనే భారత్ జట్టు 116/3తో లక్ష్యాన్ని ఛేదించేసింది.