తొలి టీ20లోనే అదరగొట్టిన నటరాజన్.. ప్రశంసలు గుప్పించిన కోహ్లి

ఆస్ట్రేలియాతో జరిగిన తొలి టీ20తో భారత్ తరఫున పొట్టి ఫార్మాట్లోకి అరంగేట్రం చేసిన నటరాజన్.. ఫస్ట్ మ్యాచ్‌లోనే అదరగొట్టాడు. 4 ఓవర్లలో 30 పరుగులిచ్చి 3 వికెట్లు పడగొట్టిన నట్టూ టీమిండియా విజయంలో కీలక పాత్ర పోషించాడు. ఆసీస్‌తో జరిగిన మూడో వన్డేతో తొలి అంతర్జాతీయ మ్యాచ్ ఆడిన నటరాజన్.. 2 వికెట్లు తీసి సత్తా చాటిన సంగతి తెలిసిందే.

వన్డే సిరీస్‌లో అద్భుతమైన బ్యాటింగ్‌తో అదరగొట్టిన మ్యాక్స్‌వెల్‌ను ఎల్బీడబ్ల్యూ చేసి టీ20ల్లో తొలి వికెట్‌ను ఖాతాలో వేసుకున్న నటరాజన్.. 15వ ఓవర్లలో ఓపెనర్ డార్సీ షార్ట్ (34)ను ఔట్ చేసి మ్యాచ్‌ను మలుపు తిప్పాడు. చివర్లో స్లో యార్కర్‌తో మిచెల్ స్టార్క్‌ను బౌల్డ్ చేశాడు. బంతుల్లో వైవిధ్యం, యార్కర్లతో ఆసీస్ బ్యాట్స్‌మెన్‌ను నిలువరించిన నట్టూ.. భారత విజయంలో కీలక పాత్ర పోషించాడు. నటరాజన్ అద్భుతంగా బౌలింగ్ చేశాడని.. అతడు జట్టుకు ఆయుధంగా మారుతాడని కోహ్లి ప్రశంసలు గుప్పించాడు.

కాన్‌బెర్రా వేదికగా జరిగిన తొలి టీ20లో టాస్ గెలిచిన ఫించ్ లక్ష్య చేధనకు మొగ్గు చూపాడు. దీంతో ముందు బ్యాటింగ్ చేసిన భారత్ 20 ఓవర్లలో 7 వికెట్ల నష్టానికి 161 పరుగులు చేసింది. బదులుగా ఆస్ట్రేలియా 7 వికెట్ల నష్టానికి 150 రన్స్ మాత్రమే చేసింది. జడేజా స్థానంలో కంకెషన్ సబ్‌స్టిట్యూట్‌గా బరిలో దిగిన చాహల్ 25 పరుగులిచ్చి 3 వికెట్లు తీశాడు.