కేఎల్ రాహుల్‌‌పై వేటు వేయండి: గవాస్కర్

ఆస్ట్రేలియాతో అడిలైడ్ వేదికగా జరుగుతున్న తొలి టెస్టు మ్యాచ్‌లో కేఎల్ రాహుల్ విఫలమైతే.. రెండో టెస్టులో అతనికి అవకాశమివ్వొద్దని దిగ్గజ క్రికెటర్ సునీల్ గవాస్కర్ సూచించాడు. గురువారం ఆరంభమైన ఈ టెస్టు మ్యాచ్‌ తొలి ఇన్నింగ్స్‌లో 8 బంతులు ఎదుర్కొన్న కేఎల్ రాహుల్ 2 పరుగులకే పేలవ రీతిలో ఔటయ్యాడు.

ఆఫ్ స్టంప్‌కి వెలుపలగా పడిన బంతిని వెంటాడిన రాహుల్.. థర్డ్ స్లిప్‌లో ఫీల్డర్ అరోన్ ఫించ్‌కి సులువైన క్యాచ్ ఇచ్చి ఔటయ్యాడు. ఇటీవల ఇంగ్లాండ్ గడ్డపై నిరాశపరిచిన కేఎల్ రాహుల్.. వెస్టిండీస్‌తో ముగిసిన రెండు టెస్టుల సిరీస్‌లోనూ విఫలమైన విషయం తెలిసిందే.

‘అడిలైడ్ టెస్టు‌లో భారత్ రెండో ఇన్నింగ్స్‌లోనూ కేఎల్ రాహుల్ ఫెయిలైతే.. అతడ్ని రెండో టెస్టు నుంచి తప్పించాలి. ఎందుకంటే.. వరుసగా విఫలమవుతుండటంతో ఇప్పుడు అతనిలో ఏమాత్రం ఆత్మవిశ్వాసం కనిపించడం లేదు. ఆఫ్ స్టంప్‌కి వెలుపల పడిన బంతిని వెంటాడటం అతని బలహీనతగా మారిపోయింది. దీనికి తోడు.. పేలవ షాట్ సెలక్షన్‌ అతడ్ని క్రీజులో కుదురుకోనివ్వడం లేదు. కనీసం ఇప్పటికైనా.. తప్పిదాలను దిద్దుకోవాలనే ఆలోచన అతనికి ఉన్నట్లు నాకు అనిపించడం లేదు’ అని సునీల్ గవాస్కర్ మండిపడ్డాడు.