ఆసీస్ బౌలింగ్‌పై ఎదురుదాడే బెస్ట్: రహానె

మెల్‌బోర్న్ టెస్టులో ఆస్ట్రేలియా బౌలింగ్‌పై ఎదురుదాడికి దిగడం ఉత్తమమని భారత మిడిలార్డర్ బ్యాట్స్‌మెన్ అజింక్య రహానె అభిప్రాయపడ్డాడు. బుధవారం ఉదయం 5.30 గంటల నుంచి మూడో టెస్టు మ్యాచ్ ప్రారంభంకానుండగా.. ఈ మ్యాచ్‌లో కనీసం శతకం సాధిస్తానని ఇప్పటికే రహానె బాహాటంగా ప్రకటించిన విషయం తెలిసిందే.

పెర్త్ వేదికగా గత వారం ముగిసిన రెండో టెస్టు మ్యాచ్‌లో దూకుడుగా ఆడిన రహానె రెండు ఇన్నింగ్స్‌ల్లో 51, 30 పరుగులతో సత్తాచాటాడు. అంతకముందు జరిగిన అడిలైడ్ టెస్టులోనూ ఈ మిడిలార్డర్ బ్యాట్స్‌మెన్ 13, 70 పరుగులతో రాణించాడు. దీనికి తోడు మెల్‌బోర్న్‌లో రహానెకి మంచి రికార్డు ఉంది. 2014-15 పర్యటనలో మెల్‌బోర్న్ వేదికగా జరిగిన టెస్టులో 147, 48 పరుగులు చేశాడు.

‘టెస్టుల్లో చతేశ్వర్ పుజారా తరహాలో నెమ్మదిగా ఆడటం ముఖ్యమే. కానీ.. నాలుగు లేదా ఐదో స్థానంలో బ్యాటింగ్ చేసే ఆటగాడు.. రెండు అడుగులు ముందుగా ఆలోచించి ఎదురుదాడికి ప్రయత్నించాలి. పెర్త్ టెస్టులో నేను అలానే ఆడేందుకు ప్రయత్నించాను. అయితే.. మ్యాచ్ గమనానికి అనుగుణంగా ఆటతీరుని మార్చుకోవడం కూడా కీలకమే’ అని అజింక్య రహానె చెప్పుకొచ్చాడు.