సిడ్నీ టెస్టులో పుజారా 4, 4, 4.. నోరెళ్లబెట్టిన బౌలర్ పాట్ కమిన్స్

ఆస్ట్రేలియాతో సిడ్నీ వేదికగా జరుగుతున్న మూడో టెస్టులో భారత టెస్టు స్పెషలిస్ట్ బ్యాట్స్‌మెన్ చతేశ్వర్ పుజారా హ్యాట్రిక్ ఫోర్లతో అందర్నీ ఆశ్చర్యపరిచాడు. నెమ్మదైన ఇన్నింగ్స్‌లకి పెట్టింది పేరైన చతేశ్వర్ పుజారా.. ఆస్ట్రేలియా అగ్రశ్రేణి బౌలర్ పాట్ కమిన్స్‌ వేసిన ఇన్నింగ్స్ 83వ ఓవర్‌లో ఎవరూ ఊహించని విధంగా బ్యాట్ ఝళిపించేశాడు. అప్పటి వరకూ బంతి ఎలాంటిదైనా డిఫెన్స్ లేదా వదిలేయడం చేస్తూ వచ్చిన పుజారా.. అలా వరుసగా 4, 4, 4 కొట్టడాన్ని కొన్ని క్షణాలపాటు పాట్ కమిన్స్ కూడా నమ్మలేకపోయాడు.

407 పరుగుల ఛేదనలో అప్పటి వరకూ దూకుడుగా ఆడిన రిషబ్ పంత్ (97: 118 బంతుల్లో 12x4, 3x6) ఔటవడంతో.. స్కోరు బోర్డు నడిపించే బాధ్యత తీసుకున్న చతేశ్వర్ పుజారా (77: 205 బంతుల్లో 12x4) బ్యాట్ ఝళిపించడం మొదలుపెట్టాడు. ఇన్నింగ్స్ 83వ ఓవర్‌లో తొలి బంతిని పాట్ కమిన్స్ ఓవర్ పిచ్‌‌ విసరగా.. కళ్లు చెదిరే రీతిలో ఆ బంతిని మిడాఫ్ దిశగా పుజారా డ్రైవ్ చేశాడు. దాంతో.. రెండో బంతిని షార్ట్ పిచ్ రూపంలో కమిన్స్ సంధించాడు. కానీ.. వెనక్కి తగ్గని పుజారా ఈసారి బ్యాక్‌ఫుట్‌పైకి వెళ్లి పాయింట్ దిశగా బౌండరీకి తరలించాడు. అసలే కొత్త బంతి.. ఆపై ఫాస్ట్ బౌలర్ కావడంతో బంతి బుల్లెట్‌లా దూసుకెళ్లింది. ఇక మూడో బంతిని కూడా మిడాన్ దిశగా బౌండరీ బాదిన పుజారా.. పూర్తి స్థాయిలో ఆధిపత్యం కనబర్చాడు.

భారత్ స్కోరు 250 వద్ద ఔటవగా.. అనంతరం 272 వద్ద ఐదో వికెట్ రూపంలో చతేశ్వర్ పుజారా ఔటయ్యాడు. పాట్ కమిన్స్ విసిరిన లెంగ్త్ డెలివరీని రాంగ్‌ లైన్‌పై ఆడిన పుజారా క్లీన్ బౌల్డయ్యాడు. తొలి ఇన్నింగ్స్‌లో 176 బంతులాడిన పుజారా 28.41 స్ట్రైక్‌రేట్‌తో 50 పరుగులే చేయడంతో తీవ్రస్థాయిలో విమర్శలు వచ్చిన విషయం తెలిసిందే. భారత మాజీ క్రికెటర్లు కూడా పుజారా నెమ్మది ఇన్నింగ్స్‌పై పెదవివిరిచారు.