బ్రిస్బేన్ టెస్టులో ఆస్ట్రేలియా 294 ఆలౌట్.. టీమిండియా టార్గెట్ 328

బ్రిస్బేన్ వేదికగా జరుగుతున్న నాలుగో టెస్టులో టీమిండియాకి 328 పరుగుల భారీ టార్గెట్‌ని ఆస్ట్రేలియా నిర్దేశించింది. ఆటలో నాలుగో రోజైన సోమవారం 21/0తో రెండో ఇన్నింగ్స్‌ని కొనసాగించిన ఆస్ట్రేలియా టీమ్.. చివరి సెషన్‌లో 294 పరుగులకి ఆలౌటైంది. దాంతో.. తొలి ఇన్నింగ్స్‌ ఆధిక్యం 33 పరుగుల్ని కలుపుకుని మొత్తం 328 పరుగుల టార్గెట్ భారత్ ముందు నిలిచింది. లక్ష్య ఛేదనకు దిగిన భారత్ జట్టు 1.5 ఓవర్లలో 4/0తో నిలిచిన దశలో వర్షం మొదలైంది. దాంతో.. ఈరోజుకి ఆటని అంపైర్లు నిలిపివేశారు. క్రీజులో ఓపెనర్లు రోహిత్ శర్మ (4 బ్యాటింగ్: 6 బంతుల్లో 1x4), శుభమన్ గిల్ (0 బ్యాటింగ్: 5 బంతుల్లో) ఉన్నారు. ఇక మంగళవారం మాత్రమే ఆట మిగిలి ఉంది.



ఆస్ట్రేలియా జట్టుకి ఈరోజు ఓపెనర్లు డేవిడ్ వార్నర్ (48) మార్కస్ హారిస్ (38) శుభారంభమిచ్చారు. తొలి వికెట్‌కి 89 పరుగుల భాగస్వామ్యం నెలకొల్పిన ఈ జోడీ ఓవర్ వ్యవధిలోనే వెనుదిరగగా.. అనంతరం వచ్చిన మార్కస్ లబుషేన్ (25), మాథ్యూవెడ్ (0) నిరాశపరిచారు. కానీ.. కామెరూన్ గ్రీన్ (37)తో కలిసి బాధ్యతాయుత ఇన్నింగ్స్ ఆడిన స్టీవ్‌స్మిత్ (55: 74 బంతుల్లో 7x4) హాఫ్ సెంచరీ నమోదు చేశాడు. ఆ తర్వాత కెప్టెన్ టిమ్ పైనీ (27: 37 బంతుల్లో 3x4) కూడా విలువైన పరుగుల్ని స్కోరు బోర్డుకి జోడించాడు. కానీ.. పైనీ ఔట్ తర్వాత వచ్చిన మిచెల్ స్టార్క్ (1), నాథన్ లయన్ (13), హేజిల్‌వుడ్ (9) దూకుడుగా ఆడే ప్రయత్నంలో ఔటవగా.. పాట్ కమిన్స్ (28 నాటౌట్: 51 బంతుల్లో 2x4, 1x6) చివరి వరకూ మొండిగా క్రీజులో నిలిచాడు.


భారత బౌలర్లలో మహ్మద్ సిరాజ్ ఐదు వికెట్లు పడగొట్టగా.. శార్ధూల్ ఠాకూర్‌కి నాలుగు వికెట్లు దక్కాయి. మిగిలిన ఒక వికెట్‌ని వాషింగ్టన్ సుందర్ పడగొట్టాడు. కెరీర్‌లో మూడో టెస్టు ఆడిన సిరాజ్‌ ఐదు వికెట్ల ప్రదర్శన చేయడం ఇదే తొలిసారి. సిడ్నీ వేదికగా ఇటీవల ముగిసిన మూడో టెస్టులో 407 పరుగుల లక్ష్యఛేదనకు దిగిన టీమిండియా.. ఆఖరికి 334/5తో మ్యాచ్‌ని డ్రాగా ముగించిన విషయం తెలిసిందే.