బ్రిస్బేన్ టెస్టులో భారత్ 336 ఆలౌట్.. ఆస్ట్రేలియా ఆధిక్యం 54

ఆస్ట్రేలియాతో బ్రిస్బేన్ వేదికగా జరుగుతున్న నాలుగో టెస్టులో భారత్ జట్టు తొలి ఇన్నింగ్స్‌లో 336 పరుగులకి ఆలౌటైంది. ఆటలో మూడో రోజైన ఆదివారం 62/2తో తొలి ఇన్నింగ్స్‌ కొనసాగించిన టీమిండియాలో.. శార్ధూల్ ఠాకూర్ (67: 115 బంతుల్లో 9x4, 2x6), వాషింగ్టన్ సుందర్ (62: 144 బంతుల్లో 7x4, 1x6) హాఫ్ సెంచరీలు నమోదు చేశారు. ఏడో వికెట్‌కి 123 పరుగుల భాగస్వామ్యం నెలకొల్పిన ఠాకూర్- సుందర్ జోడీ.. టీమ్ స్కోరు 309 వద్ద విడిపోగా.. ఆ తర్వాత కొద్దిసేపటికే భారత్ జట్టు ఆలౌటైంది. ఆస్ట్రేలియా బౌలర్లలో హేజిల్‌వుడ్ ఐదు వికెట్లు పడగొట్టగా.. పాట్ కమిన్స్, మిచెల్ స్టార్క్ చెరో రెండు, నాథన్ లయన్‌కి ఒక వికెట్ దక్కింది.


భారత్ జట్టు ఆలౌట్ తర్వాత 33 పరుగుల తొలి ఇన్నింగ్స్‌‌ ఆధిక్యంతో రెండో ఇన్నింగ్స్ ప్రారంభించిన ఆస్ట్రేలియా.. ఈరోజు ఆట ముగిసే సమయానికి 21/0తో నిలిచింది. క్రీజులో ఓపెనర్లు డేవిడ్ వార్నర్ (20 బ్యాటింగ్: 22 బంతుల్లో 3x4), మార్కస్ హారిస్ (1 బ్యాటింగ్: 14 బంతుల్లో) ఉన్నారు. తొలి ఇన్నింగ్స్ ఆధిక్యం 33 పరుగులతో కలుపుకుని మొత్తం 54 పరుగుల ఆధిక్యంలో ఆస్ట్రేలియా కొనసాగుతోంది. ఆస్ట్రేలియా తొలి ఇన్నింగ్స్‌లో 369 పరుగులకి ఆలౌటైన విషయం తెలిసిందే.

ఈరోజు మ్యాచ్‌లో శార్ధూల్ ఠాకూర్- వాషింగ్టన్ సుందర్ జోడీ ఆటే హైలైట్‌. టీమ్ స్కోరు 186/6తో నిలిచిన దశలో క్రీజులో నిలిచిన ఈ జంట ఏడో వికెట్‌కి శతక భాగస్వామ్యం నెలకొల్పింది. మరీ ముఖ్యంగా.. ఠాకూర్ వన్డే తరహా ఆటతో బౌండరీలు బాదేశాడు. మిచెల్ స్టార్క్, పాట్ కమిన్స్, హేజిల్‌వుడ్ సగటున గంటకి 140కిమీ వేగంతో షార్ట్ పిచ్ బంతుల్ని సంధించినా.. ఠాకూర్ వెనక్కి తగ్గలేదు. టెస్టు కెరీర్‌లో తొలి హాఫ్ సెంచరీ నమోదు చేసిన సుందర్, ఠాకూర్.. ఆస్ట్రేలియా బౌలర్లకి కాసేపు చెమటలు పట్టించేశారు. కానీ.. టీమ్ స్కోరు 309 వద్ద ఠాకూర్ ఔటవగా.. అనంతరం నవదీప్ సైనీ (5) మహ్మద్ సిరాజ్ (13) నిరాశపరచగా.. చివర్లో సుందర్ కూడా ఔటైపోయాడు.