కోహ్లీ జోరుకి ఆసీస్ బౌలర్లు బ్రేక్‌లేస్తారు..!: కోచ్

ఆస్ట్రేలియా గడ్డపై డిసెంబరు 6 నుంచి జరగనున్న నాలుగు టెస్టుల సిరీస్‌లో భారత్ కెప్టెన్ విరాట్ కోహ్లీ ఆధిపత్యం చెలాయించడం కష్టమేనని ఆసీస్ మాజీ కోచ్ జాన్ బుచానన్ అభిప్రాయపడ్డాడు. 2014-15లో ఆఖరిసారి ఆస్ట్రేలియాలో టెస్టు సిరీస్ ఆడిన విరాట్ కోహ్లి.. అసాధారణ రీతిలో నాలుగు శతకాలు బాది ఏకంగా 692 పరుగులు చేశాడు. దీంతో.. తాజా పర్యటనలోనూ అతను అదే జోరుని కొనసాగిస్తాడని భారత మాజీ క్రికెటర్లు ధీమా వ్యక్తం చేస్తుండగా.. జాన్ మాత్రం అతడి దూకుడికి ఆస్ట్రేలియా బౌలర్లు తెలివిగా కళ్లెం వేస్తారని చెప్పుకొచ్చాడు. గురువారం నుంచి అడిలైడ్ వేదికగా భారత్, ఆస్ట్రేలియా మధ్య తొలి టెస్టు మ్యాచ్ ఆరంభంకానుంది.

‘ఆస్ట్రేలియా జట్టులో ప్రస్తుతం విరాట్ కోహ్లీతో సరితూగే బ్యాట్స్‌మెన్ లేరనేది వాస్తవం. కానీ.. అతడ్ని నిలువరించగల బౌలర్లు మాత్రం ఉన్నారు. సిరీస్‌లో కచ్చితంగా వారు.. కోహ్లీ ఆధిపత్యాన్ని అడ్డుకుంటారు. క్రీజులోకి వచ్చిన వెంటనే కోహ్లీ పరుగులు రాబట్టేందుకు ప్రయత్నిస్తాడు. అయితే.. ఎడమచేతి వాటం ఫాస్ట్ బౌలర్ మిచెల్ స్టార్క్ అతడ్ని బుట్టులో వేసేందుకు నాలుగో స్టంప్‌ లైన్‌పై బంతులు సంధించే అవకాశం ఉంది. అప్పుడు కోహ్లీ ఆ బంతుల్ని వెంటాడొచ్చు. నాకు తెలిసి ఇప్పటికే కోహ్లీకి ఎలా బౌలింగ్ చేయాలి..? అనేదానిపై ఆస్ట్రేలియా ఓ వ్యూహం రచించి ఉంటుంది. ఈ సిరీస్‌‌ కచ్చితంగా భారత్ కెప్టెన్‌కి ఓ సవాల్’ అని జాన్ బుచానన్ వెల్లడించాడు.