4,6,6,6,2,6.. గర్ల్‌ఫ్రెండ్‌కి ఫోన్ చేసి వెక్కివెక్కి ఏడ్చిన భారత ఫాస్ట్ బౌలర్

భారత్ పర్యటనకి 2013లో వచ్చిన ఆస్ట్రేలియా.. మొహాలి వేదికగా మూడో వన్డేలో టీమిండియాని ఢీకొట్టింది. ఈ మ్యాచ్‌లో తొలుత బ్యాటింగ్ చేసిన భారత్ జట్టు.. అప్పటి కెప్టెన్ మహేంద్రసింగ్ ధోనీ (139 నాటౌట్: 121 బంతుల్లో 12x4, 5x6) సెంచరీ బాదడంతో 9 వికెట్ల నష్టానికి 303 పరుగులు చేసింది. అనంతరం లక్ష్య ఛేదనలో తడబడిన ఆస్ట్రేలియా 41.1 ఓవర్లు ముగిసే సమయానికి 213/6తో నిలిచింది. అప్పటికే టాప్ ఆర్డర్ బ్యాట్స్‌మెన్‌లు ఔటైపోడంతో భారత్ విజయం ఖాయమని అంతా ఊహించారు. కానీ.. ఫాస్ట్ బౌలర్ ఇషాంత్ శర్మ ఒకే ఒక్క ఓవర్‌లో మ్యాచ్‌ని ఆస్ట్రేలియాకి అప్పగించేశాడు.

ఆస్ట్రేలియా విజయానికి చివరి 18 బంతుల్లో 44 పరుగులు అవసరమైన దశలో బౌలింగ్‌కి వచ్చిన ఇషాంత్ శర్మ.. లయ తప్పి ఆ ఓవర్‌లో ఏకంగా 30 పరుగులు సమర్పించుకున్నాడు. అతని బౌలింగ్‌లో వరుసగా 4, 6, 6, 6, 2, 6 బాదిన జేమ్స్ ఫాల్కనర్ (64 నాటౌట్: 29 బంతుల్లో 2x4, 6x6) గెలుపు సమీకరణాన్ని ఒక్కసారిగా 12 బంతుల్లో 14 పరుగులుగా మార్చేశాడు. ఆ తర్వాత ఓవర్‌లోనూ దూకుడుగా ఆడిన ఫాల్కనర్ 49.3 ఓవర్లలోనే ఆస్ట్రేలియాని 304/6తో గెలిపించాడు.

బౌలర్‌గా తనకి పీడకలల్ని మిగిల్చిన మ్యాచ్‌ గురించి తాజాగా ఓ ఇంటర్వ్యూలో ఇషాంత్ శర్మ మాట్లాడుతూ ‘‘ఆ మ్యాచ్‌ నా లైఫ్‌లో పెద్ద టర్నింగ్ పాయింట్. ఒకే ఓవర్‌లో 30 పరుగులు ఇవ్వడం ద్వారా దేశ ద్రోహం చేశానని భావించా. ఓ 2-3 వారాలు ఎవరితోనూ మాట్లాడలేదు. నా గర్ల్‌ఫ్రెండ్‌కి మాత్రం ఫోన్ చేశా..కానీ.. ఆ సమయంలో బాధ తట్టుకోలేక వెక్కివెక్కి ఏడ్చేశా. అప్పటికే నేను భోజనం, నిద్రని మానేశా. టీవీ ఆన్ చేస్తే.. నా బౌలింగ్‌పై పెద్ద ఎత్తున విమర్శలు వినిపించేవి. అవి నన్ను ఇంకా బాధించాయి’’ అని వెల్లడించాడు.