ఆస్ట్రేలియాతో వన్డే సిరీస్‌కి హార్దిక్ వచ్చేనా..?

గాయం కారణంగా భారత్ జట్టుకి దూరమైన యువ ఆల్‌రౌండర్ హార్దిక్ పాండ్య మళ్లీ పునరాగమనం కోసం తీవ్రంగా శ్రమిస్తున్నాడు. దుబాయ్ వేదికగా సెప్టెంబరులో ముగిసిన ఆసియా కప్‌లో భాగంగా పాకిస్థాన్‌తో జరిగిన మ్యాచ్‌లో బౌలింగ్ చేస్తుండగా గాయపడిన హార్దిక్ పాండ్యాని స్ట్రెచర్‌పై మైదానం నుంచి వెలుపలికి తీసుకెళ్లిన విషయం తెలిసిందే. ఆ తర్వాత వెస్టిండీస్‌‌తో సుదీర్ఘ సిరీస్‌కి దూరమైన హార్దిక్.. తాజాగా ఆస్ట్రేలియా‌ పర్యటనకీ దూరమయ్యాడు.

ఇప్పటికే ఆసీస్‌పై టీ20లు, టెస్టుల కోసం భారత్ జట్టుని సెలక్టర్లు ప్రకటించగా.. హార్దిక్ పాండ్య ఫిట్‌నెస్ సాధించలేకపోవడంతో అతడ్ని జట్టులోకి తీసుకోలేదు. అయితే.. జనవరిలో జరగనున్న వన్డే సిరీస్‌‌కి తాను ఫిట్‌నెస్ సాధిస్తానని హార్దిక్ ధీమా వ్యక్తం చేస్తున్నాడు. జనవరి 12 నుంచి భారత్, ఆస్ట్రేలియా మధ్య మూడు వన్డేల సిరీస్ జరగనుంది.

‘దాదాపు 60 రోజుల తర్వాత మళ్లీ నేను నెట్స్‌లో బౌలింగ్ చేయడం ఆరంభించాను. వన్డేల్లో కొన్ని ఓవర్లు బౌలింగ్ చేస్తే.. కచ్చితంగా లయ అందుకోగలను. ఆస్ట్రేలియాతో జనవరిలో జరగనున్న వన్డే సిరీస్‌లో ఆడేందుకు ప్రస్తుతం తీవ్రంగా శ్రమిస్తున్నా. సొంతగడ్డపై ఆసీస్ బలమైన జట్టు.. కానీ.. భారత్ కచ్చితంగా సిరీస్‌లో గట్టి పోటీనిస్తుంది’ అని హార్దిక్ పాండ్య వెల్లడించాడు. గాయంతో హార్దిక్ దూరమైన అతని సోదరుడు కృనాల్‌ పాండ్య భారత టీ20 జట్టులో చోటు దక్కించుకున్న విషయం తెలిసిందే.