Sanjay Bangar: కేఎల్ రాహుల్ ఇంకెప్పుడు తెలుసుకుంటావ్..?

భారత టెస్టు జట్టు ఓపెనర్ కేఎల్ రాహుల్ ఆటతీరుపై టీమిండియా బ్యాటింగ్ కోచ్ సంజయ్ బంగర్ తీవ్ర స్థాయిలో మండిపడ్డాడు. ఇటీవల వెస్టిండీస్‌తో ముగిసిన సుదీర్ఘ సిరీస్‌లో ఘోరంగా విఫలమైన కేఎల్ రాహుల్.. ఈరోజు క్రికెట్ ఆస్ట్రేలియా ఎలెవన్ టీమ్‌తో జరిగిన నాలుగు రోజుల ప్రాక్టీస్ మ్యాచ్‌లోనూ 3 పరుగులకే ఔటయ్యాడు.

డిసెంబరు 6 నుంచి ఆస్ట్రేలియాతో కీలకమైన నాలుగు టెస్టుల సిరీస్ ఆరంభంకానుండగా.. కేఎల్ రాహుల్ ఔటవుతున్న తీరు టీమ్‌ని బాధిస్తోందని చెప్పుకొచ్చిన బంగర్.. ఔటయ్యేందుకు రాహుల్ కొత్త మార్గాలను అన్వేషిస్తున్నాడంటూ వాపోయాడు. కేవలం రెండు టెస్టుల అనుభవం ఉన్న పృథ్వీ షా ( 66: 69 బంతుల్లో 11x4) ఈరోజు మ్యాచ్‌లో అర్ధశతకంతో మెరవగా.. ఇప్పటికే 31టెస్టులాడిన రాహుల్ ఆట నిరాశపరిచిందని అతను అభిప్రాయపడ్డాడు.

‘కేఎల్ రాహుల్‌లో నైపుణ్యం ఉంది. కానీ.. మ్యాచ్‌లో ఔటయ్యేందుకు అతను కొత్త మార్గాలను వెతుకుతున్నాడేమో..? అనిపిస్తోంది. ఈరోజు కూడా అతని శరీరంపైకి ఏమీ బంతి రాలేదు. కానీ.. పేలవ షాట్ సెలక్షన్‌తో ఔటయ్యాడు. ఆస్ట్రేలియా గడ్డపై అతను ఫామ్ అందుకోవడం జట్టుకి చాలా ముఖ్యం. అతనేమీ యువ క్రికెటర్ కాదు.. ఇప్పటికే భారత్ తరఫున 30 టెస్టులాడాడు. కాబట్టి.. జట్టుకి మెరుగైన స్కోరు ఇవ్వాల్సిన బాధ్యత అతనిపై ఉంది. కనీసం ఇకనైనా.. ఆ బాధ్యత గుర్తిస్తే మేలు’ అని సంజయ్ బంగర్ వెల్లడించాడు.