Saini Beamer: ఫించ్.. బాల్ ఎక్కడ తగిలింది..? రాహుల్, ఆసీస్ కెప్టెన్ ఫన్నీ సన్నివేశం!

భారత్, ఆస్ట్రేలియా మధ్య రెండో వన్డేలో ఫన్నీ సంఘటన చోటు చేసుకుంది. ఇన్నింగ్స్ 11.5వ ఓవర్లో నవదీప్ సైనీ వేసిన బీమర్ ఫించ్ పొట్ట మీద తాకింది. గంటకు 145.6 కి.మీ వేగంతో విసిరిన బంతి కాస్త గట్టిగా తాకడంతో ఫించ్ నొప్పితో బాధపడ్డాడు. కానీ లక్కీగా దెబ్బ పెద్దగా తగలలేదు. వెంటనే సైనీ ఆసీస్‌కు కెప్టెన్‌కు సారీ చెప్పగా.. వికెట్ కీపర్ కేఎల్ రాహుల్, స్పిన్నర్ చాహల్ బ్యాట్స్‌మెన్ దగ్గరకు పరిగెత్తుకొచ్చారు.

చొరవ తీసుకున్న రాహుల్.. దెబ్బ ఎక్కడ తాకింది..? పొట్ట మీదా లేదంటే కాస్త కిందా..? అన్నట్టుగా నవ్వుతూ ఫించ్ పొట్ట మీద చేయి పెట్టబోయాడు. ఓయ్ ఏం చేస్తున్నావ్ అన్నట్టుగా ఫించ్ నవ్వుతూ రాహుల్ చేతిని తీసేసి.. రాహుల్ పొట్టలోకి పంచ్ విసిరాడు. దీంతో కామెంటేటర్లు కూడా ఈ సన్నివేశం చూసి సరదాగా నవ్వుకున్నారు.

బంతి ఎత్తుగా రావడంతో అంపైర్ నోబాల్‌గా ప్రకటించారు. ఫ్రీ హిట్ బాల్‌‌కు సింగిల్ కూడా తీయలేకపోయిన ఫించ్.. తర్వాతి షార్ట్ బాల్‌ను బౌండరీ బాది సైనీకి బదులు తీర్చుకున్నాడు. 15 ఓవర్లు ముగిశాక డ్రింక్స్ బ్రేక్ సందర్భంగా..ఫించ్ ఓకేనా..? అని కామెంటేటర్లు వార్నర్‌ను సరదాగా ప్రశ్నించారు.

తొలి వన్డేలో ఫస్ట్ వికెట్‌కు 156 పరుగులు జోడించిన వార్నర్-ఫించ్ జోడీ.. ఈ మ్యాచ్‌లో అంత కంటే దూకుడుగా ఆడుతోంది. వార్నర్ 39 బంతుల్లోనే హాఫ్ సెంచరీ బాదాడు. 18 ఓవర్లు ముగిసే సమయానికి ఆసీస్ వికెట్ నష్టపోకుండా 113 రన్స్ చేసింది.