Yuzvendra Chahalకి సిక్స్ కొట్టడం నేర్పించిన రోహిత్ శర్మ

బంగ్లాదేశ్‌తో జరిగిన రెండో టీ20 మ్యాచ్‌లో విధ్వంసక ఇన్నింగ్స్‌తో టీమిండియాని రోహిత్ శర్మ గెలిపించాడు. 154 పరుగుల లక్ష్యఛేదనలో కేవలం 43 బంతుల్లోనే 6 ఫోర్లు, 6 సిక్సర్లు బాదిన రోహిత్ శర్మ 85 పరుగులు చేయడంతో లక్ష్యాన్ని భారత్ జట్టు 15.4 ఓవర్లలోనే ఛేదించేసింది. మ్యాచ్‌లో రోహిత్ శర్మ మొత్తం ఆరు సిక్సర్లు బాదగా.. ఇందులో ఒక హ్యాట్రిక్ కూడా ఉంది. స్పిన్నర్ హుస్సేన్ వేసిన ఇన్నింగ్స్ 10వ ఓవర్‌లో రోహిత్ శర్మ తొలి మూడు బంతుల్నీ సిక్సర్లుగా మలిచాడు.

Read More: అప్పట్లో సచిన్.. ఇప్పుడు రోహిత్ అంతే: సెహ్వాగ్


మ్యాచ్ ముగిసిన తర్వాత రోహిత్ శర్మ‌‌ని చాహల్ ఇంటర్వ్యూ చేస్తుండగా.. సిక్సర్ల గురించి ప్రస్తావన వచ్చింది. ‘హుస్సేన్ బౌలింగ్‌లో తొలి మూడు బంతులకీ సిక్సర్లు సాధించిన తర్వాత మిగిలిన మూడింటినీ కూడా సిక్సర్లుగా మలచాలని ఆశించా. కానీ.. నాలుగో బంతి మిస్ అవగానే.. ఆ నిర్ణయాన్ని విరమించుకుని సింగిల్స్‌తో సరిపెట్టా. అయినా.. చాహల్ సిక్సర్లు కొట్టాలంటే బాడీ, కండలతో పనిలేదు. నువ్వు కూడా సిక్సర్లు కొట్టచ్చు. దానికి నువ్వు చేయాల్సింది ఒక్కటే.. షాట్ సమయంలో బంతిని సరిగా బ్యాట్‌కి మిడిల్ చేయడం. అదే టైమ్‌లో తల, శరీరాన్ని ఆ షాట్‌కి తగిన పొజిషన్‌లో ఉంచుకోవాలి. ఇవే కాదు.. సిక్స్ కొట్టాలంటే ఇంకా కొన్ని అంశాలపై శ్రద్ధ పెట్టాల్సి ఉంటుంది’ అని రోహిత్ శర్మ వెల్లడించాడు.

Read More: అంపైర్ తికమక.. గ్రౌండ్‌లోనే తిట్టేసిన రోహిత్
మ్యాచ్‌లో 4 ఓవర్లు వేసిన చాహల్ 28 పరుగులిచ్చి రెండు వికెట్లు పడగొట్టాడు. లిట్టన్ దాస్ రూపంలో మరో వికెట్ కూడా చాహల్‌కి దక్కేది. కానీ.. రిషబ్ పంత్ కీపింగ్ తప్పిదం కారణంగా ఆ వికెట్ చేజారింది.