Mayank Agarwal: కివీస్‌తో తొలి వన్డేలో భారత్‌ ఓపెనర్లు ఫెయిల్

న్యూజిలాండ్‌తో హామిల్టన్ వేదికగా బుధవారం జరుగుతున్న తొలి వన్డేలో భారత ఓపెనర్లు విఫలమయ్యారు. మ్యాచ్‌లో టాస్ గెలిచిన కివీస్ ఫీల్డింగ్ ఎంచుకోగా.. వన్డేల్లోకి ఈ మ్యాచ్‌తోనే అరంగేట్రం చేసిన పృథ్వీ షా (20: 21 బంతుల్లో 3x4), మయాంక్ అగర్వాల్ (32: 31 బంతుల్లో 6x4) పేలవంగా వికెట్లు చేజార్చుకుని అభిమానుల్ని నిరాశపరిచారు. న్యూజిలాండ్ పర్యటన ముంగిట శిఖర్ ధావన్ గాయపడగా.. చివరి టీ20లో రోహిత్ శర్మ కూడా పిక్క గాయంతో వన్డేలకి దూరమయ్యాడు. దీంతో.. పృథ్వీ షా, మయాంక్ అగర్వాల్‌లకి అవకాశం దక్కింది.

Read More: undefined

ఇన్నింగ్స్ తొలి ఓవర్‌ వేసిన టిమ్ సౌథీ బౌలింగ్‌లో కనీసం ఒక్క పరుగు కూడా చేయలేకపోయిన పృథ్వీ షా కాస్త ఒత్తిడిలోనే కనిపించాడు. ముఖ్యంగా.. శరీరంపైకి దూసుకొచ్చిన బంతుల్ని ఆడటంలో ఈ యువ ఓపెనర్ తడబడ్డాడు. దీంతో.. కివీస్ బౌలర్లు పదే పదే అతడ్ని విసిగిస్తూ.. ఆఫ్ స్టంప్‌ లైన్‌పై బంతులు సంధిస్తూ వచ్చారు. ఈ క్రమంలో ఇన్నింగ్స్ 8వ ఓవర్ వేసిన గ్రాండ్‌హోమ్ బౌలింగ్‌లో శరీరంపైకి వచ్చిన బంతిని థర్డ్ మ్యాన్ దిశగా కట్ చేసేందుకు పృథ్వీ షా ప్రయత్నించాడు. కానీ.. బ్యాట్ ఎడ్జ్ తాకిన బంతి నేరుగా వికెట్ కీపర్ టామ్ లాథమ్ చేతుల్లోకి వెళ్లింది.

Read More: IND vs NZ 1st ODI: భారత్ ఫస్ట్ బ్యాటింగ్.. పాండే, దూబేపై వేటు.. కేదార్‌కి ఛాన్స్

మరో ఓపెనర్ మయాంక్ అగర్వాల్ ఆరంభంలో చూడచక్కని బౌండరీలతో ఆకట్టుకున్నాడు. కానీ.. టిమ్ సౌథీ విసిరిన షార్ట్ పిచ్ బాల్‌ని పాయింట్ దిశగా బౌండరీకి తరలించేందుకు ప్రయత్నించాడు. అయితే.. షాట్ అతను ఆశించిన విధంగా కనెక్ట్ కాకపోవడంతో బంతి నేరుగా వెళ్లి పాయింట్ ఫీల్డర్ టామ్ బ్లండెల్‌ చేతికి చిక్కింది. దీంతో.. 8.4 ఓవర్లకే భారత ఓపెనర్లు (54/2) పెవిలియన్‌కి చేరిపోయారు.