Sunil Gavaskar: రిషబ్ పంత్‌ని వెనకేసుకొచ్చిన గవాస్కర్..!

న్యూజిలాండ్‌తో వెల్లింగ్టన్ వేదికగా బుధవారం జరిగిన తొలి టీ20 మ్యాచ్‌లో ఘోరంగా విఫలమైన భారత యువ హిట్టర్ రిషబ్ పంత్‌కి దిగ్గజ క్రికెటర్ సునీల్ గవాస్కర్ మద్దతుగా నిలిచాడు. మ్యాచ్‌లో 10 బంతులు ఎదుర్కొన్న పంత్ కనీసం ఒక బంతిని కూడా సరిగా కనెక్ట్ చేయలేకపోయాడు. దీంతో.. కీలక సమయంలో 4 పరుగుల వ్యక్తిగత స్కోరు వద్దే అతను ఔటైపోయాడు.

కివీస్ స్పిన్నర్ మిచెల్ శాంట్నర్ విసిరిన యార్కర్ బంతిని అడ్డుకోవడంలో పేలవంగా విఫలమైన పంత్ క్లీన్ బౌల్డయ్యాడు. అతను ఔట్ తర్వాత ఒత్తిడికి గురైన భారత్ జట్టు 220 పరుగుల ఛేదనలో 139 పరుగులకే ఆలౌటైంది. దీంతో.. 80 పరుగుల తేడాతో గెలుపొందిన న్యూజిలాండ్ జట్టు మూడు టీ20ల సిరీస్‌లో 1-0తో ఆధిక్యంలో నిలవగా.. రెండో టీ20 శుక్రవారం జరగనుంది.

మ్యాచ్‌లో 10 బంతులు ఎదుర్కొన్న పంత్‌ కనీసం ఒక బౌండరీ కూడా సాధించలేకపోవడం, పేలవంగా వికెట్ చేజార్చుకోవడంపై తీవ్ర స్థాయిలో విమర్శలు చెలరేగాయి. దీంతో.. అతనికి మద్దతుగా నిలిచిన గవాస్కర్.. కేవలం ఒక్క మ్యాచ్‌తోనే ఆటగాడి ప్రదర్శనని అంచనా వేస్తే ఎలా..? అని ప్రశ్నించాడు.

‘ప్రపంచకప్‌‌లో రిషబ్ పంత్‌ ఆడే అవకాశాల గురించి నేను అతిగా ఆలోచించడం లేదు. ఎందుకంటే భారత్‌ వేదికగా ఆస్ట్రేలియాతో ఈనెల 24 నుంచి రెండు టీ20లు, ఐదు వన్డేల సిరీస్ జరగనుంది. ఆ సిరీస్‌లో రిషబ్ పంత్ కచ్చితంగా ప్రభావితం చూపిస్తాడు. ఇక బుధవారం జరిగిన తొలి టీ20లో అతని ఆట గురించి మాట్లాడితే..? అతను న్యూజిలాండ్‌తో వన్డే సిరీస్‌లో లేడు కాబట్టి.. ఇటీవలే టీ20 సిరీస్‌ కోసం అక్కడికి వెళ్లాడు. అలా ప్రయాణం చేసిన తర్వాత వెంటనే అత్యుత్తమ ప్రదర్శన చేయడం కష్టం. అలా అని.. రిషబ్ పంత్‌ ఆటని ఉపేక్షించాలని నేను చెప్పడం లేదు. కానీ.. ముగిసింది ఒక్క మ్యాచే కాబట్టి.. పెద్దగా పట్టించుకోవాల్సిన అవసరం లేదు’ అని గవాస్కర్ వెల్లడించాడు.