రెండో టెస్టుకి టీమిండియా ఓపెనర్ ఫిట్..!

న్యూజిలాండ్‌తో రెండో టెస్టు ముంగిట భారత్‌కి ఊరటనిచ్చే వార్త. రెండు రోజుల క్రితం గాయపడిన ఓపెనర్ పృథ్వీ షా పూర్తి స్థాయిలో ఫిట్‌నెస్ సాధించినట్లు టీమిండియా చీఫ్ కోచ్ రవిశాస్త్రి స్పష్టం చేశాడు. క్రైస్ట్‌చర్చ్ వేదికగా శనివారం ఉదయం 4 గంటల నుంచి రెండో టెస్టు మ్యాచ్ ప్రారంభంకానుండగా.. ఈ మ్యాచ్‌లో మయాంక్ అగర్వాల్‌తో కలిసి భారత్ ఇన్నింగ్స్‌ని పృథ్వీ షా ఆరంభించే అవకాశం ఉంది.

వాస్తవానికి తొలి టెస్టులో రెండు ఇన్నింగ్స్‌ల్లో కలిపి 16, 14 పరుగులు మాత్రమే చేసిన పృథ్వీ షాపై రెండో టెస్టుకి వేటు వేయాలని డిమాండ్స్ వినిపించాయి. అతని స్థానంలో రెండో టెస్టుకి మరో ఓపెనర్ శుభమన్ గిల్‌ని ఆడించాలని కూడా కొంత మంది మాజీ క్రికెటర్లు సూచించారు. ఈ క్రమంలోనే గాయపడిన పృథ్వీ షా.. ఎడమ కాలి పాదం వాచడంతో గురువారం ప్రాక్టీస్ సెషన్‌కి దూరంగా ఉన్నాడు. దీంతో.. శుభమన్‌ గిల్‌కి మార్గం సుగుమమైందని వార్తలు వచ్చాయి.

కానీ.. ఈరోజు మీడియాతో మాట్లాడిన రవిశాస్త్రి.. పృథ్వీ షా పూర్తి స్థాయిలో ఫిట్‌నెస్ సాధించినట్లు ప్రకటించాడు. దీంతో.. రెండో టెస్టులో మళ్లీ పృథ్వీ షా, గిల్ మధ్య ఓపెనింగ్ స్థానం కోసం పోటీ మొదలైంది. గత ఏడాది నుంచి టెస్టులకి ఎంపికవుతున్నా.. గిల్‌కి తుది జట్టులో మాత్రం ఒక్క అవకాశం కూడా దక్కలేదు.