Jasprit Bumrah ఏంటిది..? సూపర్ ఓవర్‌లో ఫెయిల్

భారత ఫాస్ట్ బౌలర్ జస్‌ప్రీత్ బుమ్రాకి డెత్ ఓవర్ల స్పెషలిస్ట్‌గా మంచి పేరుంది. ఆఖరి ఓవర్లలో పదునైనా యార్కర్లని సంధించడంతో పాటు బౌన్సర్లతోనూ ప్రత్యర్థి బ్యాట్స్‌మెన్‌లను కట్టడి చేయడంలో అతనికి తిరుగులేదని రికార్డులు చెప్తున్నాయి. కానీ.. కెరీర్‌లో తొలిసారి తన సామర్థ్యంపై జస్‌ప్రీత్ బుమ్రా అభిమానుల్లో సందేహాలు రేకెత్తించాడు.

Read Also: IND vs NZ Trolls: కివీస్ బౌలర్లూ.. ఇంటి దగ్గర చెప్పొచ్చారా..? రోహిత్ శర్మ అక్కడ..!
న్యూజిలాండ్‌తో హామిల్టన్ వేదికగా బుధవారం జరిగిన మూడో టీ20 మ్యాచ్‌లో.. కివీస్ విజయానికి చివరి 12 బంతుల్లో 20 పరుగులు అవసరం అయ్యాయి. ఈ దశలో బౌలింగ్‌కి వచ్చిన బుమ్రా.. రెండు ఫోర్లు సమర్పించుకోవడంతో పాటు ఏకంగా 11 పరుగులిచ్చేశాడు. దీంతో.. మ్యాచ్‌ భారత్‌కి చేజారిపోయిందని అంతా ఊహించారు. కానీ.. చివరి ఓవర్‌లో షమీ 8 పరుగులే ఇచ్చి రెండు వికెట్లు పడగొట్టడంతో మ్యాచ్‌ టైగా ముగిసింది.


మ్యాచ్‌ టై కావడంతో సూపర్ ఓవర్ నిర్వహించగా.. భారత్ తరఫున ఆ ఓవర్‌ని వేసిన బుమ్రా మరోసారి తేలిపోయాడు. అతని బౌలింగ్‌ని ఉతికారేసిన విలియమ్సన్, మార్టిన్ గప్తిల్ ఏకంగా 17 పరుగులు పిండుకున్నారు. అయితే.. రోహిత్ శర్మ అద్భుతంగా చివరి రెండు బంతుల్నీ సిక్సర్లుగా మలిచి భారత్‌ని గెలిపించాడు. లేకుంటే.. మ్యాచ్‌ చేజార్చిన అపవాదు బుమ్రా ఖాతాలో పడేది.


వెన్ను గాయం నుంచి కోలుకుని ఇటీవల భారత జట్టులోకీ రీఎంట్రీ ఇచ్చిన బుమ్రా.. మునుపటిలా బౌలింగ్ చేయలేకపోతున్నాడు. దానికి నిదర్శనం.. ఈ సూపర్ ఓవరే. 2017లో గుజరాత్‌ లయన్స్‌తో జరిగిన ఐపీఎల్ మ్యాచ్‌లో సూపర్ ఓవర్ వేసిన బుమ్రా కేవలం 4 పరుగులే ఇచ్చాడు. ఆ తర్వాత 2019లో సన్‌రైజర్స్ హైదరాబాద్‌తో జరిగిన సూపర్ ఓవర్‌లో 8 పరుగులే ఇచ్చాడు. ఈ రెండు మ్యాచ్‌ల్లోనూ ముంబయి‌ ఇండియన్స్ టీమ్‌ని ఒంటిచేత్తో గెలిపించిన బుమ్రా.. హామిల్టన్‌లో 17 పరుగులివ్వడం అందర్నీ ఆశ్చర్యపరుస్తోంది.