Ind vs NZ: ఇర్ఫాన్ పఠాన్ 15ఏళ్ల నాటి రికార్డ్ బ్రేక్.. షమీ @100

న్యూజిలాండ్‌తో నేపియర్ వేదికగా ఈరోజు జరుగుతున్న తొలి వన్డేలో భారత ఫాస్ట్ బౌలర్ మహ్మద్ షమీ అరుదైన రికార్డ్ నెలకొల్పాడు. మ్యాచ్ రెండో ఓవర్‌లోనే కివీస్ ఓపెనర్ మార్టిన్ గప్తిల్ (5: 9 బంతుల్లో 1x4)ని బౌల్డ్ చేసిన మహ్మద్ షమీ.. భారత్ తరఫున వేగంగా 100 వికెట్ల మైలురాయిని అందుకున్న ఫాస్ట్ బౌలర్‌గా నిలిచాడు. కెరీర్‌లో 56వ వన్డే ఆడుతున్న షమీ 5.51 ఎకానమీతో ఈ వంద వికెట్ల మైలురాయిని అందుకోగా.. 2004‌లో ఇర్ఫాన్ పఠాన్ నెలకొల్పిన రికార్డ్ బద్దలైంది..!

పాకిస్థాన్‌తో 15ఏళ్ల క్రితం అబుదాబి వేదికగా జరిగిన మ్యాచ్‌లో ఇర్ఫాన్ పఠాన్ తన 59వ వన్డేలో 100 వికెట్ల మైలురాయిని అందుకోగా.. షమీ 56వ వన్డేతోనే ఆ మార్క్‌ని చేరుకున్నాడు. ఈ జాబితాలో షమీ, పఠాన్ తర్వాత.. జహీర్ ఖాన్ 65 వన్డేల్లో, అజిత్ అగార్కర్ 67 వన్డేల్లో, జవగళ్ శ్రీనాథ్ 68 వన్డేల్లో ఈ వంద వికెట్ల మైలురాయిని అందుకున్నారు.

మహ్మద్ షమీ తక్కువ వన్డేల్లోనే ఈ మార్క్‌ని చేరుకున్నప్పటికీ.. అందరి కంటే ఎక్కువ సమయం తీసుకున్నాడు. ఇర్ఫాన్ పఠాన్, జహీర్, అగార్కర్ కేవలం రెండేళ్ల వ్యవధిలోనే ఆ మైలురాయిని అందుకోగా.. షమీ మాత్రం వన్డేల్లోకి అరంగేట్రం చేసిన ఆరేళ్ల 17 రోజులకి 100 వికెట్ల క్లబ్‌లో చేరడం విశేషం.

ఈరోజు తొలి వన్డేలో కుల్దీప్ యాదవ్ (4/39), మహ్మద్ షమీ (3/19), చాహల్ (2/43) ధాటికి టాస్ గెలిచి తొలుత బ్యాటింగ్ చేసిన న్యూజిలాండ్‌ జట్టు 38 ఓవర్లలోనే 157 పరుగులకే ఆలౌటైంది