WTC Finalకి ఈరోజు కూడా వర్షం ముప్పు.. డ్రా తప్పదా..?

భారత్, న్యూజిలాండ్ మధ్య సౌథాంప్టన్ వేదికగా జరుగుతున్న ఐసీసీ వరల్డ్ టెస్టు ఛాంపియన్‌షిప్ ఫైనల్ మ్యాచ్ డ్రాగా ముగిసే సూచనలు కనిపిస్తున్నాయి. ఇప్పటికే శుక్రవారం, సోమవారం ఆట మొత్తం తుడిచిపెట్టుకుపోగా.. శనివారం, ఆదివారం కలిపి 141.1 ఓవర్ల ఆట మాత్రమే సాధ్యమైంది. మ్యాచ్‌లో ఫస్ట్ బ్యాటింగ్ చేసిన భారత జట్టు 92.1 ఓవర్లు బ్యాటింగ్ చేసి 217 పరుగులకి ఆలౌటవగా.. అనంతరం మొదటి ఇన్నింగ్స్ ఆడుతున్న న్యూజిలాండ్ 49 ఓవర్లలో 101/2తో కొనసాగుతోంది. న్యూజిలాండ్ ఇంకా తొలి ఇన్నింగ్స్‌లో 116 పరుగులు వెనకబడి ఉంది. మ్యాచ్‌లో ఇంకా రోజుల ఆట మాత్రమే మిగిలి ఉంది. అది కూడా రిజర్వ్ డే (బుధవారం)తో కలుపుకుని. దాంతో.. మ్యాచ్ ఫలితం లేలడంపై సందిగ్ధత నెలకొంది. సౌథాంప్టన్ స్టేడియం పరిసరాల్లో ఈరోజు ఉదయం, మధ్యాహ్నం 3-4 గంటల మధ్య వర్షం పడే సూచనలు కనిపిస్తున్నాయి. దాంతో.. మంగళవారం కూడా ఆటకి అంతరాయం తప్పేలా లేదు. అలానే బుధవారం కూడా వర్షం పడే అవకాశం ఉన్నట్లు వార్తలు వస్తున్నాయి.

ఐసీసీ వరల్డ్ టెస్టు ఛాంపియన్‌షిప్‌ విజేతకి రూ.11.67 కోట్లు ప్రైజ్‌మనీ దక్కనుంది. అలానే ఐసీసీ వరల్డ్ టెస్టు ఛాంపియన్‌షిప్‌ గద కూడా ఇవ్వనున్నారు. ఇక రన్నరప్‌గా నిలిచిన జట్టుకి రూ.5.84 కోట్లు ఇవ్వనున్నారు. ఒకవేళ మ్యాచ్ డ్రాగా ముగిస్తే ప్రైజ్‌మనీని రెండు జట్లూ సమంగా పంచుకోనున్నాయి.