Suryakumar Yadav మాస్టర్‌ స్ట్రోక్.. తొలి టీ20లో ధోనీని తలపించిన బ్యాటర్

వెస్టిండీస్‌తో తొలి టీ20లో భారత కెప్టెన్ రోహిత్ శర్మ కేవలం 19 బంతుల్లోనే 4x4, 3x6 సాయంతో 40 పరుగులు చేశాడు. కానీ.. గేమ్ ఛేంజర్ అవార్డు మాత్రం సూర్యకుమార్ యాదవ్ (34 నాటౌట్: 18 బంతుల్లో 5x4, 1x6)కి దక్కింది. 158 పరుగుల ఛేదనలో టీమిండియా 14.3 ఓవర్లు ముగిసే సమయానికి 114/4తో ఒత్తిడిలో నిలిచింది. కానీ.. ఈ దశలో సమయోచితంగా ఆడిన సూర్యకుమార్ యాదవ్.. మాజీ కెప్టెన్ మహేంద్రసింగ్ ధోనీ తరహాలో లెక్కలు వేసుకుంటూ రిస్క్ తీసుకుని భారత్‌ జట్టుని గెలిపించాడు.

మ్యాచ్‌లో టాస్ ఓడి మొదట బ్యాటింగ్ చేసిన వెస్టిండీస్ జట్టు 7 వికెట్ల నష్టానికి 157 పరుగులు చేసింది. అనంతరం లక్ష్యాన్ని భారత్ జట్టు మరో 7 బంతులు మిగిలి ఉండగానే 162/4తో ఛేదించింది. వెంకటేశ్ అయ్యర్ (24 నాటౌట్: 13 బంతుల్లో 2x4, 1x6)తో కలిసి సూర్యకుమార్ యాదవ్ ఐదో వికెట్‌కి అజేయంగా 48 పరుగుల భాగస్వామ్యం నెలకొల్పాడు. నెం.6లో క్రీజులోకి వచ్చిన వెంకటేశ్ అయ్యర్ తొలుత ఒత్తిడిలో కనిపించాడు. తన సహజ శైలికి భిన్నంగా ఆడేందుకు ప్రయత్నిస్తూ.. స్కూప్‌కీ విఫలయత్నం చేశాడు. కానీ.. సూర్యకుమార్ యాదవ్ తాను రిస్క్ తీసుకుని.. వెంకటేశ్ అయ్యర్‌పై ఒత్తిడిని తగ్గించాడు.

భారత్ జట్టు విజయానికి చివరి 24 బంతుల్లో 32 పరుగులు అవసరమయ్యాయి. ఈ దశలో భారత్ శిబిరంలో ఒత్తిడి కనిపించింది. కానీ.. ఇన్నింగ్స్ 17వ ఓవర్ వేసిన షెల్డాన్ కాట్రెల్ బౌలింగ్‌లో సూర్యకుమార్ యాదవ్ రిస్క్ తీసుకుని.. వరుసగా 4, 6 బాదేసి మ్యాచ్‌ని పూర్తిగా భారత్ చేతుల్లోకి తెచ్చేశాడు. ఆ ఓవర్‌లో ఐదో బంతిని ఎక్స్‌ట్రా కవర్ దిశగా చూడచక్కని బౌండరీ బాదిన సూర్యకుమార్ యాదవ్.. ఆరో బంతిని ఫుల్ చేస్తూ ఫైన్ లెగ్ దిశగా సిక్స్‌గా తరలించేశాడు. దాంతో.. ఆ ఓవర్ ముగిసే సమయానికి సమీకరణం 18 బంతుల్లో 19 పరుగులతో తేలికగా మారిపోయింది. ధోనీ కూడా ఇలానే ఏ ఓవర్‌లో రిస్క్ తీసుకోవాలి? ఏ బౌలర్‌ని టార్గెట్ చేయాలి? అనేదానిపై క్లారిటీతో కనిపించేవాడు. దాంతో.. టీ20ల్లో భారత్‌కి సూర్యకుమార్ యాదవ్ రూపంలో ఫినిషర్ దొరికేశాడంటూ నెటిజన్లు కితాబిస్తున్నారు.