క్రికెట్ ప్రపంచానికి కోహ్లీనే లీడర్: లారా

క్రికెట్ ప్రపంచానికి ఇప్పుడు కోహ్లీనే నాయకుడని వెస్టిండీస్ దిగ్గజ క్రికెటర్ బ్రియాన్ లారా అభిప్రాయపడ్డాడు. విండీస్‌తో ఇటీవల ముగిసిన ఐదు వన్డేల సిరీస్‌లో వరుసగా మూడు శతకాలు బాదిన విరాట్ కోహ్లి.. రికార్డుల మోత మోగించిన విషయం తెలిసిందే. ఈ సిరీస్‌లోనే వన్డేల్లో 10వేల పరుగుల మైలురాయిని అందుకున్న కోహ్లి.. ఆ మార్క్‌ని వేగంగా చేరుకున్న క్రికెటర్‌గానూ రికార్డు నెలకొల్పాడు.

కోహ్లి జోరుతో ఐదు వన్డేల సిరీస్‌ని భారత్ జట్టు 3-1తో చేజిక్కించుకోగా.. ఆదివారం నుంచి మూడు టీ20ల సిరీస్‌ మొదలుకానుంది. ఈ నేపథ్యంలో.. మీడియాతో బ్రియాన్ లారా మాట్లాడాడు. అయితే.. ఈ టీ20 సిరీస్‌ నుంచి కోహ్లీకి విశ్రాంతినిచ్చిన సెలక్టర్లు.. అతని స్థానంలో రోహిత్‌ శర్మకి జట్టు పగ్గాలు అప్పగించిన విషయం తెలిసిందే.

‘క్రికెట్‌కి విరాట్ కోహ్లి రూపంలో ఇప్పుడు ఓ లీడర్ దొరికాడు. అతని పరుగులు సాధిస్తున్న తీరు, ఫిట్‌నెస్ అమోఘం. అన్నికంటే ముఖ్యంగా.. ఆటపై కోహ్లీకి ఉన్న అంకితభావం అతడ్ని ప్రత్యేకమైన క్రికెటర్‌గా నిలబెడుతోంది. కోహ్లీని నాయకుడి స్థానంలో చూడటం గొప్ప అనుభూతి. ఇక పోలికలంటారా..? కోహ్లి పోలికల్ని అస్సలు పట్టించుకోడని నేను నమ్ముతున్నా’ అని బ్రియాన్ లారా వెల్లడించాడు.