ఆసీస్‌తో ఆటాడుకున్న శ్రేయస్ అయ్యర్

ముంబై: పచ్చికతో ఉన్న పిచ్ మీద వార్మప్ మ్యాచ్‌లో తిరుగులేని ఆధిక్యం ప్రదర్శించాలనుకున్న ఆసీస్‌కు శ్రేయస్ అయ్యర్ రూపంలో షాక్ తగిలింది. ఆస్ట్రేలియాతో జరుగుతున్న ప్రాక్టీస్‌ మ్యాచ్‌లో భారత్ - ఎ జట్టు ఆటగాడు శ్రేయస్ అయ్యర్ డబుల్ సెంచరీతో సత్తా చాటాడు. మిగతా బ్యాట్స్‌మెన్ విఫలమైనా.. శ్రేయస్ మాత్రం ఆసీస్ బౌలర్లతో ఆటాడుకున్నాడు. 210 బంతుల్లోనే 202 పరుగులతో శ్రేయస్ నాటౌట్‌గా నిలవడంతో భారత్-ఎ జట్టు తొలి ఇన్నింగ్స్‌లో 403 పరుగులకు ఆలౌట్ అయ్యింది. 176/4 ఓవర్ నైట్ స్కోరు‌తో మూడో రోజు ఆట ప్రారంభించిన భారత్ 'ఎ' జట్టు తొలి సెషన్‌లోనే రిషబ్ పంత్(21) వికెట్ కోల్పోయింది. ఇషాన్ కిషన్(4) కూడా వెంటనే అవుట్ కావడంతో కష్టాల్లో పడింది. ఈ దశలో.. గౌతమ్ (74)తో కలిసి అయ్యర్ ఇన్నింగ్స్ చక్కదిద్దాడు. ఈ మ్యాచ్‌లో అయ్యర్ 27 ఫోర్లు, 7 సిక్సర్లు బాదడం విశేషం.

అంతకు ముందు బ్యాటింగ్ చేసిన ఆస్ట్రేలియా జట్టు తొలి ఇన్నింగ్స్‌లో ఏడు వికెట్ల నష్టానికి 469 పరుగుల వద్ద ఇన్నింగ్స్ డిక్లేర్ చేసింది. ఆ జట్టులో కెప్టెన్ స్టీవ్ స్మిత్, షాన్ మార్ష్ సెంచరీలు చేయగా.. హ్యాండ్స్ కాంబ్, వేడ్ అర్ధ సెంచరీలతో రాణించారు. భారత్ ‘ఎ’ తరఫున శ్రేయస్ అయ్యర్ రాణించడంతో.. మూడు రోజుల ప్రాక్టీస్ మ్యాచ్ డ్రాగా ముగియనుంది.