పుష్ అప్స్‌ ఛాలెంజ్: కోహ్లీకి ట్విస్ట్ ఇచ్చిన హార్దిక్ పాండ్య

భారత కెప్టెన్ విరాట్ కోహ్లీ, ఆల్‌రౌండర్ హార్దిక్ పాండ్యా మధ్య పుష్ అప్స్‌ ఛాలెంజ్ పతాక స్థాయికి చేరింది. తొలుత హార్దిక్ పాండ్యా గాల్లోకి ఎగురుతూ పుష్ అప్స్‌ తీయగా.. ఆ ఛాలెంజ్‌ని స్వీకరించిన విరాట్ కోహ్లీ పుష్ అప్స్‌‌కి చప్పట్లని యాడ్ చేస్తూ ట్విస్ట్ ఇచ్చాడు. దాంతో.. హార్దిక్ పాండ్య ఈసారి మరింత ప్రమాదకరంగా పుష్ అప్స్‌‌ని తీస్తూ.. మరో ట్విస్ట్‌ని జతచేశాడు. మరి కోహ్లీ ఈ ఛాలెంజ్‌ని స్వీకరిస్తాడా..?

వాస్తవానికి గాల్లోకి ఎగురుతూ పుష్ అప్స్ తీసే క్రమంలో ఆటగాళ్లు గాయపడే ప్రమాదాలు లేకపోలేదు. సరైన పొజీషన్‌లో ల్యాండ్ అవలేకపోతే ప్రమాదం. అయినప్పటికీ కోహ్లీ, హార్దిక్ పాండ్యా అవలీలగా వాటిని చేస్తుండటం.. వారి ఫిట్‌నెస్ సామర్థ్యానికి నిదర్శనంగా చెప్పొచ్చు.


వెన్ను గాయం కారణంగా గత ఏడాది సెప్టెంబరు నుంచి అంతర్జాతీయ క్రికెట్‌కి దూరంగా ఉంటున్న హార్దిక్ పాండ్యా.. సర్జరీ చేయించుకుని ఈ ఏడాది ఫిబ్రవరిలో పూర్తి స్థాయిలో ఫిట్‌నెస్ సాధించాడు. దాంతో.. మార్చి నెలలో దక్షిణాఫ్రికాతో జరగాల్సిన వన్డే సిరీస్‌కి అతను జట్టులోకి కూడా ఎంపికయ్యాడు. కానీ.. కరోనా వైరస్ కారణంగా ఆ సిరీస్ అర్ధారంతంగా నిలిచిపోవడంతో.. అంతర్జాతీయ క్రికెట్‌లోకి అతని రీఎంటీ ఆలస్యమవుతోంది.