టీ20 వరల్డ్‌కప్‌ ఆతిథ్యంపై భారత్, ఆస్ట్రేలియా మధ్య పోటీ

ఆస్ట్రేలియా వేదికగా ఈ ఏడాది అక్టోబరు 18 నుంచి నవంబరు 15 వరకూ జరగాల్సిన టీ20 వరల్డ్‌కప్‌ వాయిదాపడటం దాదాపు ఖాయమవగా.. వచ్చే ఏడాది టీ20 వరల్డ్‌కప్ ఆతిథ్యంపై భారత్, ఆస్ట్రేలియా మధ్య పోటీ మొదలైంది. వాస్తవానికి 2021 టీ20 ప్రపంచకప్ ఆతిథ్య హక్కులు భారత క్రికెట్ నియంత్రణ మండలి (బీసీసీఐ) వద్ద ఉన్నాయి. కానీ.. ఈ ఏడాది టీ20 వరల్డ్‌కప్ వాయిదా వేస్తున్నందున వచ్చే ఏడాది టోర్నీ ఆతిథ్యం అవకాశం తమకి ఇవ్వాలని క్రికెట్ ఆస్ట్రేలియా (సీఏ) పట్టుబడుతోంది. దాంతో.. ఈ ఏడాది టీ20 వరల్డ్‌కప్ వాయిదాపై ఐసీసీ ఎలాంటి నిర్ణయం తీసుకోలేకపోతోంది.

ఈ ఏడాది జరగాల్సిన టీ20 వరల్డ్‌కప్‌ వాయిదాపడితే..? అది 2022లో జరిగే అవకాశం ఉంది. ఎందుకంటే.. 2021లో టీ20 వరల్డ్‌కప్ జరిగేలా ఇప్పటికే ప్రాథమికంగా షెడ్యూల్ రూపొందించారు. ఇక 2023లో వన్డే ప్రపంచకప్‌ భారత్‌లో జరగాల్సి ఉంది. దాంతో.. ఇప్పుడు ఆస్ట్రేలియా‌కి వచ్చే ఏడాది టీ20 వరల్డ్‌కప్ ఆతిథ్య హక్కుల్ని బీసీసీఐ బదిలీ చేస్తే..? 2022లో టీ20 ప్రపంచకప్, 2023లో వన్డే ప్రపంచకప్‌కి వరుసగా భారత్ ఆతిథ్యం ఇవ్వాల్సి ఉంటుంది. ఇలా బ్యాక్ టు బ్యాక్ వరల్డ్‌కప్‌‌లకి ఆతిథ్యమివ్వడం బీసీసీఐకి పెద్ద తలనొప్పిగా మారనుంది. దాంతో క్రికెట్ ఆస్ట్రేలియా (సీఏ) ప్రతిపాదనకి బీసీసీఐ నో చెప్తోంది.

ఈ ఏడాది జరగాల్సిన టీ20 ప్రపంచకప్‌ వాయిదాపై త్వరలోనే ఐసీసీ ఓ నిర్ణయం ప్రకటించనుంది. ఈ నెల మూడో వారంలో ఐసీసీ మీటింగ్ జరిగే సూచనలు కనిపిస్తుండగా.. ఆ మీటింగ్‌లో వరల్డ్‌కప్ వాయిదాపై ఓ స్పష్టత వస్తుందని అంచనా. ఒకవేళ టీ20 వరల్డ్‌కప్ వాయిదాపడితే.. ఆ అక్టోబరు- నవంబరు విండోలో ఐపీఎల్ 2020 సీజన్‌ని నిర్వహించాలని బీసీసీఐ ప్లాన్ చేస్తోంది. దాంతో.. ఐపీఎల్ కోసం తాము టీ20 వరల్డ్‌కప్ వాయిదాకి ఒప్పుకుంటున్నామని చెప్పుకొస్తున్న క్రికెట్ ఆస్ట్రేలియా.. దానికి బదులుగా వచ్చే ఏడాది ఆతిథ్య హక్కులు ఇవ్వాలని డిమాండ్ చేస్తోంది.