India Double Centuries: ఔరా టీమిండియా.. వరుసగా 4 టెస్టుల్లో 4 డబుల్ సెంచరీలు

భారత్ గడ్డపై టెస్టుల్లో టీమిండియా ఆధిపత్యం బంగ్లాదేశ్‌పైనా కొనసాగుతోంది. ఇటీవల దక్షిణాఫ్రికాతో ముగిసిన మూడు టెస్టుల సిరీస్‌ని 3-0తో చేజిక్కించుకున్న టీమిండియా.. బంగ్లాదేశ్‌తో ఇండోర్ వేదికగా తాజాగా జరుగుతున్న తొలి టెస్టులోనూ విజయానికి బాటలు వేసుకుంది. మ్యాచ్‌లో టాస్ గెలిచి తొలుత బ్యాటింగ్ చేసిన బంగ్లాదేశ్ జట్టుని తొలి ఇన్నింగ్స్‌లో 150 పరుగులకే కుప్పకూల్చిన భారత్.. ఓపెనర్ మయాంక్ అగర్వాల్ (243: 330 బంతుల్లో 28x4, 8x6) డబుల్ సెంచరీ బాదడంతో ఈరోజు ఆట ముగిసే సమయానికి తొలి ఇన్నింగ్స్‌లో 493/6తో నిలిచింది.

Read More: సిక్స్‌తో మయాంక్ అగర్వాల్ డబుల్ సెంచరీ

ఆటలో రెండో రోజైన శుక్రవారం మూడో సెషన్‌లో సిక్స్ బాది డబుల్ సెంచరీ మార్క్‌ని అందుకున్న మయాంక్ అగర్వాల్.. నాలుగు టెస్టుల వ్యవధిలోనే రెండు డబుల్ సెంచరీలు బాదిన బ్యాట్స్‌మెన్‌గా నిలిచాడు. టీమిండియా కూడా వరుసగా నాలుగు టెస్టుల్లోనూ నాలుగు డబుల్ సెంచరీలు నమోదు చేసిన తొలి జట్టుగా అరుదైన ఘనత సాధించింది. ఇప్పటి వరకూ టెస్టు క్రికెట్ చరిత్రలో ఈ తరహాలో ఏ జట్టు కూడా వరుసగా ద్విశతకాలు నమోదు చేయలేదు.

Read More: టీమిండియాలోకి ధోనీ రీఎంట్రీ డేట్ ఫిక్స్..!
దక్షిణాఫ్రికాతో విశాఖపట్నం వేదికగా ఇటీవల జరిగిన తొలి టెస్టు మ్యాచ్‌లో మయాంక్ అగర్వాల్ 215 పరుగులు చేయగా.. అనంతరం పుణె టెస్టులో విరాట్ కోహ్లీ 254 పరుగులతో నాటౌట్‌గా నిలిచాడు. ఆ తర్వాత రాంచీ వేదికగా సఫారీలతో జరిగిన మూడో టెస్టులో రోహిత్ శర్మ 212 పరుగులు చేశాడు. తాజాగా బంగ్లాదేశ్‌తో ఇండోర్‌లో జరుగుతున్న టెస్టులో మళ్లీ మయాంక్ అగర్వాల్ 243 పరుగులు చేశాడు. దీంతో.. వరుసగా నాలుగు టెస్టుల్లోనూ భారత క్రికెటర్లు డబుల్ సెంచరీలు నమోదు చేశారు. ఇటీవల వరుసగా మూడు డబుల్ సెంచరీల రికార్డ్‌ని కూడా దక్షిణాఫ్రికాపై మయాంక్, కోహ్లీ, రోహిత్ జోడీ బ్రేక్ చేసిన విషయం తెలిసిందే.

undefined