వణికించిన బెహ్రెన్‌డార్ఫ్.. భారత్ 118 ఆలౌట్

గువహటి: ఆస్ట్రేలియాతో జరుగుతున్న రెండో టీ20 మ్యాచ్‌లో భారత బ్యాట్స్‌మెన్ చేతులెత్తేశారు. టీ20ల్లో కోహ్లి తొలిసారి డకౌటైన వేళ.. పొట్టి ఫార్మాట్లో ధోనీ మొదటిసారి స్టంపౌటయిన వేళ.. టీమిండియా స్వల్ప స్కోరుకే పరిమితమైంది. టాస్ గెలిచి ముందుగా బ్యాటింగ్ ఎంచుకున్న డేవిడ్ వార్నర్ ఫీల్డింగ్ ఎంచుకున్నాడు. కెరీర్లో రెండో టీ20 మ్యాచ్ ఆడుతున్న జాసన్ బెహ్రెన్‌డార్ఫ్ కెప్టెన్ నమ్మకాన్ని నిలబెట్టాడు. నాలుగు వికెట్లతో జాసన్ అద్భుత ప్రదర్శన చేయడంతో టీమిండియా 118 పరుగులకే ఆలౌల్ అయ్యింది.

తొలి ఓవర్లోనే రోహిత్ శర్మ, కెప్టెన్ విరాట్ కోహ్లిలను పెవిలియన్‌కు పంపిన బెహ్రన్‌డార్ఫ్.. తర్వాతి ఓవర్లలో మనీష్ పాండే (6), శిఖర్ ధావన్ (2)ను అవుట్ చేశాడు. దీంతో భారత్ పీకల్లోతు కష్టాల్లో కూరుకుపోయింది. ఈ దశలో కేదార్ జాదవ్ (27) ధోనీ (13)తో కలిసి జట్టును ఆదుకునేందుకు ప్రయత్నించాడు. కానీ వీరిద్దర్నీ ఆడమ్ జంపా పెవిలియన్ చేర్చాడు.

వరుస విరామాల్లో వికెట్లు కోల్పోవడంతో భారత జట్టు ఏ దశలోనూ కోలుకోలేకపోయింది. హర్దిక్ పాండ్య (25), కుల్దీప్ యాదవ్ (16) ఆదుకోవడంతో జట్టు 100 పరుగుల మార్క్ దాటింది. చివర్లో భారీ షాట్లు ఆడేందుకు యత్నించిన పాండ్య అవుటయ్యాడు. టెయిలెండర్లు కూడా చేతులెత్తేయడంతో భారత జట్టు 20 ఓవర్లలో 118 పరుగులకే ఆలౌటయ్యింది.

భారత్ బ్యాట్స్‌మెన్‌ను వణికించిన బెహ్రెన్‌డార్ఫ్.. టీ20ల్లో భారత్‌పై అత్యుత్తమ బౌలింగ్ ప్రదర్శన చేసిన ఆసీస్ బౌలర్‌గా రికార్డు నెలకొల్పాడు. ఈ మ్యాచ్‌లో అతడు 21 పరుగులిచ్చి 4 వికెట్లు తీశాడు. 2008లో నాథన్ బ్రాకెన్ మెల్‌బోర్న్‌లో 11 పరులిచ్చి 3 వికెట్లు పడగొట్టాడు.