టెస్టుల్లో లంకేయుల్ని ఊడ్చేసిన కోహ్లిసేన..!

టెస్టుల్లో విరాట్ కోహ్లి సారథ్యంలోని భారత్ జట్టు జైత్రయాత్ర శ్రీలంకలోనూ కొనసాగింది. సోమవారం ముగిసిన మూడు టెస్టుల సిరీస్‌లో టీమిండియా 3-0 తేడాతో లంకేయుల్ని ఊడ్చేసింది. పల్లెకలె వేదికగా శనివారం ఆరంభమైన చివరి టెస్టుల్లో పూర్తిస్థాయి‌ ఆధిపత్యం ప్రదర్శించిన భారత్ మరో రెండు రోజులు మిగిలి ఉండగానే ఇన్నింగ్స్, 171 పరుగుల తేడాతో మ్యాచ్‌ని గెలుపుగా ముగించేసింది.

సోమవారం 19/2తో ఫాలోఆన్‌లో భాగంగా రెండో ఇన్నింగ్స్ కొనసాగించిన శ్రీలంక జట్టు భారత్ బౌలర్లు అశ్విన్ (68/3), మహ్మద్ షమీ (3/32) ధాటికి 181 పరుగులకే కుప్పకూలిపోయింది. ఆ జట్టులో డిక్వెల్లా (41) ఒక్కడే చెప్పుకోదగ్గ ఇన్నింగ్స్ ఆడాడు. తొలి ఇన్నింగ్స్‌లో టీమిండియా 487 పరుగులకు ఆలౌటవగా.. శ్రీలంక తొలి ఇన్నింగ్స్‌లో 135 పరుగులకే ఆలౌటైంది. ఆగస్టు 20 నుంచి శ్రీలంకతో భారత్ ఐదు వన్డేల సిరీస్ ఆడనుంది.