టెస్టు ర్యాంకింగ్స్‌లో భారత్ టాప్..!

టెస్టు ర్యాంకింగ్స్‌లో అగ్రస్థానాన్ని విరాట్ కోహ్లి కెప్టెన్సీలోని భారత్ జట్టు కాపాడుకుంది. ఐసీసీ గురువారం రాత్రి ప్రకటించిన ర్యాంకింగ్స్ జాబితాలో 123 పాయింట్లతో నిలిచిన భారత్ నెం.1 స్థానాన్ని నిలబెట్టుకోగా.. 117 పాయింట్లతో దక్షిణాఫ్రికా రెండో స్థానంలో నిలిచింది. గత ఏడాది నుంచి మార్చి వరకు సొంతగడ్డపై భారత్ వరుసగా న్యూజిలాండ్, ఇంగ్లాండ్, బంగ్లాదేశ్, ఆస్ట్రేలియాతో టెస్టు సిరీస్‌లు ఆడింది.

టీమిండియా చేతిలో నాలుగు టెస్టుల సిరీస్‌ని చేజార్చుకున్న ఆస్ట్రేలియా ఏడు పాయింట్లు కోల్పోయి ప్రస్తుతం 100 పాయింట్లతో మూడో స్థానంలో నిలిచింది. తర్వాత స్థానంలో ఇంగ్లాండ్ (99), న్యూజిలాండ్ (97) ఉన్నాయి. ఇటీవల వరుసగా టెస్టు సిరీస్‌లు ఆడుతున్న పాకిస్థాన్ 97 నుంచి 93 పాయింట్లకు పడిపోయి.. ఆరో స్థానానికి పరిమితమవగా.. తర్వాత శ్రీలంక (91), వెస్టిండీస్ (75), బంగ్లాదేశ్ (69), జింబాబ్వే నిలిచాయి. జూన్ 1 నుంచి ఛాంపియన్స్ ట్రోఫీ ఆరంభంకానున్న నేపథ్యంలో మరో నెల రోజుల పాటు ఈ ర్యాంక్స్‌లో మార్పులు ఉండే అవకాశం లేదు.