ఆకట్టుకున్న భారత యువ ఆటగాళ్లు.. శ్రీలంక లక్ష్యం 163 రన్స్

తొలి టీ20 మ్యాచ్‌లో శ్రీలంక ముందు 163 పరుగుల లక్ష్యాన్ని నిర్దేశించింది భారత జట్టు. క్రమం తప్పకుండా వికెట్లు కోల్పోయినా.. చివర్లో యువ బ్యాటర్లు దీపక్ హుడా (41 పరుగులు, 23 బంతుల్లో, 4 సిక్స్‌లు, 1 ఫోర్), అక్షర్ పటేల్ (31 పరుగులు, 20 బంతుల్లో, 3 ఫోర్లు, 1 సిక్స్) దూకుడుగా ఆడటంతో భారత్ గౌరవప్రదమైన స్కోరు చేసింది. ఓపెనర్‌గా వచ్చిన మరో యువ ఆటగాడు ఇషాన్ కిషన్ 37 పరుగులు (29 బంతుల్లో, 2 సిక్స్‌లు, 3 ఫోర్లు) చేశాడు. కెప్టెన్ హార్దిక్ పాండ్యా 29 పరుగులు (27 బంతుల్లో, 4 ఫోర్లు) చేశాడు. సూర్యకుమార్ యాదవ్ (7), శుభమన్ గిల్ (7), సంజూ సాంమ్సన్ (5) తక్కువ స్కోరుకే పెవిలీయన్ చేరారు. నిర్ణీత 20 ఓవర్లలో భారత జట్టు 5 వికెట్ల నష్టానికి 162 పరుగులు చేసింది.

ముంబైలోని వాంఖడే వేదికగా జరుగుతున్న ఈ మ్యాచ్‌లో టాస్‌ గెలిచిన శ్రీలంక కెప్టెన్ డాసున్ శనక బౌలింగ్‌ ఎంచుకొన్నాడు. లంక బౌలర్లు కట్టుదిట్టంగా బౌలింగ్ చేశారు. భారీ షాట్లు ఆడే ప్రయత్నంలో సూర్య కుమార్ యాదవ్, సంజూ సాంమ్సన్ ఔటయ్యారు. శ్రీలంక జట్టులో దిల్షాన్ మదుశంక, మహీష్ తీక్షణ, చమిక కరుణరత్నే, ధనంజయ డిసిల్వా, వనిందు హసరంగా తలో వికెట్ తీశారు.