IPL ముగియగానే ఆస్ట్రేలియా పర్యటనకు టీమిండియా.. షెడ్యూల్ ఇదే..!

ఐపీఎల్ 2020 ముగిసిన తర్వాత భారత జట్టు ఆస్ట్రేలియాలో పర్యటించనుంది. యూఏఈ నుంచి భారత క్రికెటర్లు నేరుగా ఆస్ట్రేలియా బయల్దేరి వెళ్లనున్నారు. ఈ పర్యటనలో కోహ్లి సేన మూడు టీ20లు, మూడు వన్డేలు, 4 టెస్టులు ఆడనుంది. ఈ మ్యాచ్‌లకు సంబంధించి ప్రతిపాదిత షెడ్యూల్ వివరాలకు బయటకొచ్చాయి. దీని ప్రకారం.. భారత్, ఆస్ట్రేలియా మధ్య తొలి వన్డే మ్యాచ్‌ నవంబర్ 26న జరగనుంది. డిసెంబర్ 4న తొలి టీ20 జరగననుండగా.. డిసెంబర్ 17న డై అండ్ నైట్ టెస్ట్ మ్యాచ్ జరగనుంది. ఈ షెడ్యూల్‌లో మార్పులు జరిగే అవకాశం సైతం ఉంది.

కొద్ది నెలల క్రితమే ఆస్ట్రేలియా పర్యటనకు సంబంధించి భారత జట్టు షెడ్యూల్‌ను ప్రకటించారు. కానీ కరోనా నేపథ్యంలో టీ20 వరల్డ్ కప్ వాయిదా పడటంతో.. షెడ్యూల్‌లో చాలా వరకు మార్పులు చేశారు. అక్టోబర్‌లోనే భారత జట్టు ఆస్ట్రేలియాతో టీ20లు ఆడాల్సి ఉండగా.. దాని స్థానంలో వన్డే సిరీస్ తర్వాత డిసెంబర్లో టీ20 సిరీస్ నిర్వహించబోతున్నారు.

ప్రస్తుతం ఐపీఎల్ ఆడుతున్న క్రికెటర్లందరూ బయో బబుల్‌లో ఉన్నారు. దీంతో భారత జట్టును యూఏఈ నుంచే బబుల్ టు బబుల్ ఆస్ట్రేలియాకు పంపించే యోచనలో బీసీసీఐ ఉంది. ఒకవేళ భారత క్రికెటర్లు స్వదేశానికి తిరిగొస్తే మళ్లీ క్వారంటైన్ తలనొప్పులు ఉంటాయి. టెస్టు మ్యాచ్‌లో నిర్వహించేది చివర్లో కాబట్టి.. పుజారా లాంటి ఆటగాళ్లు ఆలస్యంగా జట్టుతో చేరినా.. క్వారంటైన్ పెద్ద సమస్య కాబోదు.
ప్రభుత్వాల నుంచి అనుమతులు రాగానే.. షెడ్యూల్‌ను అధికారికంగా ప్రకటించే అవకాశం ఉంది. నవంబర్ 10న ఐపీఎల్ ఫైనల్ జరగనుంది. ఆ తర్వాత నవంబర్ 26న ఆస్ట్రేలియా, భారత్ మధ్య తొలి వన్డే జరగనుంది. దీంతో కంగారూల గడ్డ మీద అడుగుపెట్టిన తర్వాత 14 రోజుల క్వారంటైన్ సమయంలోనూ ట్రైనింగ్‌కి అనుమతి పొందడం ఇరు దేశాల క్రికెట్ బోర్డులకు సవాల్‌గా మారింది.