IND vs AUS: సంజయ్ మంజ్రేకర్‌కు ఊరటనిచ్చిన క్రికెట్ ఆస్ట్రేలియా..

భారత్-ఆస్ట్రేలియా సిరీస్‌‌ సందర్భంగా సంజయ్ మంజ్రేకర్ మరోసారి కామెంట్రీ ప్యానెల్‌లో దర్శనం ఇవ్వనున్నాడు. గత మార్చి నెల నుంచి కామెంట్రీకి దూరంగా ఉన్న సంజయ్ మంజ్రేకర్‌.. ధర్మశాలలో దక్షిణాఫ్రికాతో జరిగిన తొలి వన్డేలో కామెంట్రీ చెప్పడానికి వెళ్లలేదు. దీంతో మంజ్రేకర్‌ను బీసీసీఐ కామెంట్రీ ప్యానెల్ నుంచి తప్పించిన విషయం బయటకొచ్చింది. ఐపీఎల్‌లోనూ కామెంట్రీ చెప్పే అవకాశాన్ని బోర్డు మంజ్రేకర్‌కు ఇవ్వలేదు.

ఐపీఎల్ కామెంట్రీ ప్యానెల్‌లో తనకు చోటు కల్పించాలని మంజ్రేకర్ రెండుసార్లు బీసీసీఐకి లేఖ రాసినప్పటికీ.. ఫలితం లేకపోయింది. భారత్-ఆస్ట్రేలియా సిరీస్‌కు ఆతిథ్యం ఇస్తున్న.. క్రికెట్ ఆస్ట్రేలియాకే కామెంట్రీ ప్యానెల్ ఎంపిక సహా ఇతర నిర్ణయాలను తీసుకునే హక్కుంది.

సంజయ్ మంజ్రేకర్‌ను కామెంట్రీ ప్యానెల్ నుంచి తప్పించడం వెనుక కారణాలను బీసీసీఐ ఇప్పటికీ వెల్లడించలేదు. 2019-20 సీజన్లో మంజ్రేకర్ వివాదాస్పద వ్యాఖ్యలు చేశారు. వరల్డ్ కప్ సమయంలో రవీంద్ర జడేజాను బిట్స్ అండ్ పీసెస్ ప్లేయర్ అన్న మంజ్రేకర్.. 2019 నవంబర్లో హర్షా భోగ్లేను సైతం విమర్శించారు.

మంజ్రేకర్‌‌తోపాటు గ్లెన్ మెక్‌గ్రాత్, నిక్ నైట్, హర్షా భోగ్లే, అజయ్ జడేజా, మురళీ కార్తీక్, అజిత్ అగార్కర్ కూడా కామెంట్రీ ప్యానెల్‌లో ఉండనున్నారు. 2016లో కామెంటేటర్‌గా ప్రస్థానం ప్రారంభించిన వీరేంద్ర సెహ్వాగ్.. హిందీ కామెంట్రీ ప్యానెల్‌లో ప్రత్యేక ఆకర్షణగా నిలవనున్నాడు. జహీర్ ఖాన్, వజియ్ దహియా, మహ్మద్ కైఫ్, వివేక్ రజ్దాన్, అర్జున్ పండిట్ హిందీ కామెంట్రీ ప్యానెల్‌లో భాగం కాబోతున్నారు.

కోహ్లి సేన ఆస్ట్రేలియా పర్యటన మూడు వన్డేల సిరీస్‌తో ప్రారంభం కానుంది. నవంబర్ 27, 29, డిసెంబర్ 2 తేదీల్లో వన్డేలు జరగనుండగా.. డిసెంబర్ 4, 6, 8 తేదీల్లో టీ20 మ్యాచ్‌లు జరగనున్నాయి. ఆ తర్వాత బోర్డర్ గావస్కర్ ట్రోఫీలో భాగంగా డిసెంబర్ 17న అడిలైడ్ వేదికగా తొలి టెస్టు ప్రారంభం కానుంది. తర్వాతి టెస్టులకు మెల్‌బోర్న్ (డిసెంబర్ 26), సిడ్నీ (జనవరి 7), బ్రిస్బేన్ (జనవరి 15) ఆతిథ్యం ఇవ్వనున్నాయి.