పిచ్ కంటే వాటి ప్రభావమే ఎక్కువ: కోహ్లి

పుణే పిచ్‌కు పూర్ రేటింగ్ ఇచ్చిన ఐసీసీ బెంగళూరు పిచ్‌కి వెరీ గుడ్ రేటింగ్ ఇవ్వడంతో సిరీస్‌లో కీలమైన రాంచీ టెస్టులో పిచ్ ఎలా ఉంటుందనే చర్చ మొదలైంది. కానీ మూడో టెస్టులో పిచ్ కంటే బాహ్య పరిస్థితులే మరింతగా ప్రభావితం చేస్తాయని విరాట్ అభిప్రాయపడ్డాడు. బయటి పరిస్థితులను బట్టి పిచ్ స్వభావం మారిపోయే అవకాశం ఉందన్నాడు. వాతావరణం కూడా రాంచీ పిచ్‌పై ప్రభావం చూపుతుంది. వేడి, ఉక్కపోతే కారణంగా బౌలర్లు బంతిని రివర్స్ స్వింగ్ చేసే వీలుందని కోహ్లి తెలిపాడు.

పిచ్‌ను చూడగానే ఫలితాన్ని అంచనా వేసే క్రికెటర్‌ను నేను ఇప్పటి వరకూ చూడలేదు. పిచ్ ఎంతలా టర్న్ అవుతుంది, బౌన్స్ అవుతుందనే విషయమై అప్పుడే ఓ నిర్ధారణకు రాలేం అని విరాట్ వ్యాఖ్యానించాడు. క్రికెట్ క్లిష్టమైన ఆట కాబట్టి, దేనికైనా సిద్ధంగా ఉండాలని చెప్పాడు.

ఈ సిరీస్‌లో భారత బ్యాటింగ్ ఆర్డర్ కుప్పకూలడంపై కోహ్లి స్పందిస్తూ.. నేను పిచ్ గురించి ఎక్కుగా ఏం మాట్లాడను. విపరీతమైన ఒత్తిడిలో ఉన్నప్పుడు ఫ్లాట్ వికెట్‌పై కూడా కుప్పకూలతాం. నా ఉద్దేశంలో బ్యాట్స్‌మెన్ వరుసబెట్టి క్యూ కట్టడానికి స్కిల్ కంటే మానసిక అంశాలే ప్రధాన కారణం అని కోహ్లి చెప్పుకొచ్చాడు. రెండో రోజు నుంచే రాంచీ పిచ్‌పై పగుళ్లు వస్తాయని, స్పిన్‌కు అనుకూలిస్తుందని ఆసీస్ కెప్టెన్ స్మిత్ అభిప్రాయపడ్డాడు. పిచ్‌పై బౌన్స్, స్పిన్ తక్కువగా ఉండే అవకాశం ఉందని స్టీవ్ అంచనా వేశాడు.