విరాట్‌వి పనికి మాలిన మాటలు: స్మిత్

డీఆర్ఎస్ విషయంలో స్మిత్ చాలాసార్లు మోసం చేశాడంటూ విరాట్ కోహ్లి చేసిన ఆరోపణలను ఆసీస్ కెప్టెన్ తిప్పికొట్టాడు. విరాట్ చెప్పిందంతా ఉత్తిదేనని కొట్టిపారేశాడు. బెంగళూరు టెస్టులో స్మిత్ ఎల్బీడబ్ల్యూ కాగా.. డీఆర్ఎస్ కోరే విషయంలో సలహా కోసం అతడు డ్రెస్సింగ్ రూం బాల్కనీ వైపు చూడటం వివాదాస్పదమైంది. ‘నా దృష్టిలో వారు చేస్తున్నదంతా తప్పు. ఆట ముగిశాక నేను చేసింది తప్పేనని చెప్పాను. ఏం చేయాలో తెలియని స్థితిలో అలా చేశా’నని మూడో టెస్టు ముందు మీడియా సమావేశంలో స్మిత్ వెల్లడించాడు. ఈ వివాదంలో ఐసీసీ ఎవరిపైనా క్రమశిక్షణ చర్యలు తీసుకోలేదు.

‘పదే పదే ఆ వివాదం గురించి మాట్లాడాల్సిన అవసరం లేదు. ఇప్పటి వరకూ ఈ సిరీస్ గొప్పగా గడిచింది. మూడో టెస్టు కోసం ఎదురు చూస్తున్నాం’ అని స్మిత్ వ్యాఖ్యానించాడు. ఇరు జట్లు నిబంధనల ప్రకారమే ఆడాల్సి ఉందని అంపైర్లు సూచించారని స్మిత్ తెలిపాడు. భారత్, ఆసీస్ మధ్య సిరీస్ ఎప్పుడూ హోరాహోరీగానే ఉంటుందన్నాడు.

బెంగళూరు టెస్టు తొలి ఇన్నింగ్స్‌లో 8 వికెట్లు తీసిన ఆఫ్ స్పిన్నర్ నాథన్ లియాన్ కుడి చేతి చూపుడు వేలికి గాయమైంది. అయితే అతడు ఫిట్‌గానే ఉన్నాడని స్మిత్ చెప్పాడు. రాంచీ టెస్టులోగా అతడు తప్పకుండా కోలుకుంటాడనే ఆశాభావాన్ని స్మిత్ వ్యక్తం చేశాడు. స్టార్క్ గాయం కారణంగా మిగతా మ్యాచ్‌లకు అందుబాటులో లేనప్పటికీ తమ బౌలింగ్ విభాగం బలంగానే ఉందన్నాడు. స్టార్క్ స్థానంలో ప్యాట్ కమిన్స్ ఆడే అవకాశాలున్నాయి.