India Vs Australia Live Score : విజయానికి ఒక వికెట్ దూరంలో భారత్

ఆస్ట్రేలియాతో అడిలైడ్ వేదికగా జరుగుతున్న తొలి టెస్టు మ్యాచ్‌లో భారత్ జట్టు విజయానికి ఒక వికెట్ దూరంలో ఉంది. 323 పరుగుల లక్ష్య ఛేదనలో భాగంగా మ్యాచ్‌లో ఆఖరి రోజైన సోమవారం ఓవర్‌నైట్ స్కోరు 104/4తో రెండో ఇన్నింగ్స్‌ని కొనసాగించిన ఆస్ట్రేలియా జట్టు ప్రస్తుతం 260/9తో కొనసాగుతోంది.

నిన్న భారత్ బౌలర్ల సహనాన్ని పరీక్షించిన ట్రావిస్ హెడ్(14: 62 బంతుల్లో 1x4)‌ని ఇషాంత్ శర్మ ఈరోజు ఆరంభంలోనే పెవిలియన్ బాట పట్టించగా.. అర్ధశతకంతో ప్రమాదకరంగా కనిపించిన షాన్ మార్ష్ (60: 166 బంతుల్లో 5x4)‌ని బుమ్రా బోల్తా కొట్టించాడు. ఆ తర్వాత కాసేపు క్రీజులో ఒంటరి పోరాటం చేసిన కెప్టెన్ టిమ్‌పైన్ (41: 73 బంతుల్లో 4x4) కూడా బుమ్రా బౌలింగ్‌లోనే ఔటవడంతో.. ఆస్ట్రేలియా ఒత్తిడిలో పడిపోయింది. అయితే.. అనంతరం వచ్చిన మిచెల్ స్టార్క్ (28: 44 బంతుల్లో 2x4) కాసేపు దూకుడుగా ఆడినా.. జట్టు స్కోరు 228 వద్ద అతనూ 8 వికెట్ రూపంలో ఔటవగా.. పాట్ కమిన్స్ (27 బ్యాటింగ్: 118 బంతుల్లో 3x4)‌ని బుమ్రా బుట్టులో వేసేశాడు. ఆ జట్టు విజయానికి ఇంకా 63 పరుగులు చేయాల్సి ఉంది.

India vs Australia 1st Test స్కోరు బోర్డు కోసం క్లిక్ చేయండి..!
అడిలైడ్‌లో వేదికగా జరిగిన టెస్టుల్లో ఇప్పటి వరకు ఒకే ఒక్కసారి ఆస్ట్రేలియా జట్టు 300పైచిలుకు లక్ష్యాన్ని ఛేదించింది. అది కూడా శతాబ్దం కిందట. 1902లో ఇంగ్లాండ్ జట్టు 315 పరుగుల లక్ష్యాన్ని ఆసీస్‌కి నిర్దేశించగా ఆ జట్టు 6 వికెట్లు కోల్పోయి అప్పట్లో ఛేదించింది. ఇప్పటి వరకు అడిలైడ్‌ పిచ్‌పై ఇదే అత్యుత్తమం. ఇక ఆఖరిగా 2015లో న్యూజిలాండ్ నిర్దేశించిన 187 పరుగుల లక్ష్యాన్ని 7 వికెట్లు కోల్పోయి కంగారూలు ఛేదించారు. సుదీర్ఘ చరిత్రలో ఈ రెండే ఆస్ట్రేలియాకి అడిలైడ్‌లో విజయవంతమైన ఛేదనలు.

భారత్ జట్టు తొలి ఇన్నింగ్స్‌లో 250 పరుగులకి ఆలౌటవగా.. ఆస్ట్రేలియా 235కే కుప్పకూలింది. దీంతో.. 15 పరుగుల ఆధిక్యాన్ని అందుకున్న టీమిండియా.. రెండో ఇన్నింగ్స్‌లో 307 పరుగులకి ఆలౌటైంది.