అడిలైడ్‌లో 116 ఏళ్ల రికార్డు ముంగిట ఆసీస్..!

ఆస్ట్రేలియా జట్టుకి సొంతగడ్డపై తొలి టెస్టులోనే కఠిన సవాల్ ఎదురైంది. అడిలైడ్ వేదికగా జరుగుతున్న ఈ టెస్టు మ్యాచ్‌లో చతేశ్వర్ పుజారా (71: 204 బంతుల్లో 9x4), అజింక్య రహానె (70 బ్యాటింగ్: 147 బంతుల్లో 7x4) అర్ధశతకాలు బాదడంతో 323 పరుగుల భారీ లక్ష్యాన్ని ఆస్ట్రేలియాకి భారత్ నిర్దేశించింది. బౌలర్లకి అతిగా అనుకూలించే అడిలైడ్‌ పిచ్‌పై 300పైచిలుకు లక్ష్యం ఛేదించడం దాదాపు అసాధ్యమని రికార్డులు చెప్తున్నాయి. ఒకవేళ ఆస్ట్రేలియా జట్టు ఛేదిస్తే..? 116 ఏళ్ల నాటి రికార్డు బద్దలవడం ఖాయం..!
India Vs Australia Live Score : అడిలైడ్‌ టెస్టులో గెలుపు ముంగిట భారత్

అడిలైడ్‌లో జరిగిన టెస్టుల్లో ఇప్పటి వరకు ఒకే ఒక్కసారి ఆస్ట్రేలియా జట్టు 300పైచిలుకు లక్ష్యాన్ని ఛేదించింది. అది కూడా శతాబ్దం కిందట. 1902లో ఇంగ్లాండ్ జట్టు 315 పరుగుల లక్ష్యాన్ని ఆసీస్‌కి నిర్దేశించగా ఆ జట్టు 6 వికెట్లు కోల్పోయి అప్పట్లో ఛేదించింది. ఇప్పటి వరకు అడిలైడ్‌ పిచ్‌పై ఇదే అత్యుత్తమం. ఇక ఆఖరిగా 2015లో న్యూజిలాండ్ నిర్దేశించిన 187 పరుగుల లక్ష్యాన్ని 7 వికెట్లు కోల్పోయి కంగారూలు ఛేదించారు. సుదీర్ఘ చరిత్రలో ఈ రెండే ఆస్ట్రేలియాకి అడిలైడ్‌లో విజయవంతమైన ఛేదనలు. దీంతో.. భారత్ జట్టు ఈ టెస్టులో ఓడిపోవడం దాదాపు అసాధ్యం. ఇక గెలుపు లేదా డ్రా అనేది బౌలర్ల చేతుల్లోనే ఉంది..!!