అడిలైడ్ టెస్టులో పంత్.. 4, 4, 4, 6, ఔట్

ఆస్ట్రేలియా గడ్డపై భారత యువ హిట్టర్ రిషబ్ పంత్ జోరు కొనసాగిస్తున్నాడు. ఇటీవల ముగిసిన టీ20 సిరీస్‌లో మెరుపు ఇన్నింగ్స్‌లతో ఆకట్టుకున్న రిషబ్ పంత్.. తాజాగా అడిలైడ్ వేదికగా జరుగుతున్న తొలి టెస్టుల్లోనూ బౌండరీల మోత మోగించాడు. క్రీజులో ఉన్నంతసేపు దూకుడుగా ఆడిన ఈ యువ వికెట్ కీపర్.. టీ20 తరహాలో అభిమానుల్ని అలరించాడు.

అడిలైడ్ టెస్టులో నాలుగు రోజైన ఆదివారం రెండో ఇన్నింగ్స్‌లో 16 బంతులు ఎదుర్కొన్న రిషబ్ పంత్.. 4x4, 1x6 సాయంతో 28 పరుగులు చేశాడు. ఇందులో ముప్పావు వంతు పరుగులు ఒకే ఓవర్‌లో ఈ యువ హిట్టర్ రాబట్టేశాడు. పుజారా (71), విరాట్ కోహ్లి (34), రహానె (70), రోహిత్ శర్మ (1) వికెట్లను పడగొట్టి మంచి ఊపుమీద కనిపించిన స్పిన్నన్ నాథన్ లయన్.. 95వ ఓవర్‌లో మిడ్‌వికెట్‌లో ఫీల్డర్‌ని ఉంచి రిషబ్ పంత్‌ను ఊరిస్తూ బంతులు విసిరాడు.

కానీ.. క్రీజు వెలుపలికి వచ్చి భారీ షాట్లు ఆడిన రిషబ్ పంత్.. ఆ ఓవర్‌లోని చివరి నాలుగు బంతుల్నీ వరుసగా 4, 4, 4, 6 బాదేశాడు. కానీ.. ఆ తర్వాత 97వ ఓవర్‌లో లయన్ వేసిన తొలి బంతికే పంత్ ఔటయ్యాడు. ఈ మ్యాచ్‌లో ఆస్ట్రేలియాకి 323 పరుగుల భారీ లక్ష్యాన్ని భారత్ నిర్దేశించింది.