కంగారొద్దు.. ఈడెన్‌లో మ్యాచ్ పక్కా: గంగూలీ

కోల్‌కతాలో గత కొద్దిరోజులుగా భారీ వర్షం పడుతున్నా.. ఈడెన్‌ గార్డెన్స్‌ మైదానాన్ని చక్కగా సంరక్షిస్తున్నామని భారత మాజీ కెప్టెన్, బెంగాల్ క్రికెట్ అసోషియేషన్ అధ్యక్షుడు సౌరవ్ గంగూలీ స్పష్టం చేశారు. భారత్, ఆస్ట్రేలియా మధ్య ఈ నెల 21న ఈడెన్ గార్డెన్స్‌లో రెండో వన్డే జరగాల్సి ఉంది. కానీ.. భారీ వర్షాల కారణంగా మైదానం పాడయిందంటూ వస్తున్న వార్తల్ని ఖండించిన గంగూలీ.. వివరణ ఇచ్చే ప్రయత్నం చేశారు.

‘ఈడెన్‌ గార్డెన్స్‌ మైదానం మునుపటి రూపు రేఖల్ని ఏమీ కోల్పోలేదు. రెండో వన్డే కోసం మేము పిచ్‌, మైదానాన్ని సిద్ధం చేయగలం. గత కొద్ది రోజులుగా భారీ వర్షం పడుతున్న మాట వాస్తవమే. కానీ.. మైదానాన్ని చక్కగా కవర్లతో కప్పి ఉంచి సంరక్షిస్తున్నాం’ అని వివరించాడు. శ్రీలంకతో బుధవారం ముగిసిన సుదీర్ఘ సిరీస్‌లో వరుస విజయాలు సాధించిన భారత్ జట్టు నూతనుత్తేజంతో సొంతగడ్డపై ఆస్ట్రేలియాని ఢీకొట్టబోతోంది. సెప్టెంబరు 17న చెన్నైలోని చెపాక్ స్టేడియంలో తొలి వన్డే జరగనుంది.