ఆస్ట్రేలియా గడ్డపై రోహిత్ శర్మకి 5 ఓవర్లే టెస్టు.. ఆ తర్వాత ఉతుకుడే: భజ్జీ

ఆస్ట్రేలియా గడ్డపై రోహిత్ శర్మ జోరందుకుంటే అతడ్ని నిలువరించడం చాలా కష్టమని భారత వెటరన్ ఆఫ్ స్పిన్నర్ హర్భజన్ సింగ్ అభిప్రాయపడ్డాడు. నవంబరు 27 నుంచి మూడు వన్డేలు, మూడు టీ20లు, నాలుగు టెస్టుల సిరీస్‌లో కంగారూలతో టీమిండియా ఢీకొట్టబోతోంది. అయితే.. తొడ కండరాల గాయం నుంచి ఇటీవల కోలుకున్న రోహిత్ శర్మని కేవలం టెస్టు సిరీస్‌కి మాత్రమే సెలెక్టర్లు ఎంపిక చేయగా.. అతను ప్రస్తుతం బెంగళూరులోని నేషనల్ క్రికెట్ అకాడమీలో ఫిట్‌నెస్ పరీక్షలకి హాజరవుతున్నాడు. ఒకవేళ అతను ఫిట్‌నెస్ టెస్టులో పాసైతే..? డిసెంబరు 17 నుంచి ప్రారంభంకానున్న టెస్టు సిరీస్‌లో ఆడేందుకు ఆస్ట్రేలియాకి వెళ్లనున్నాడు.

ఆస్ట్రేలియా గడ్డపై రోహిత్ శర్మ టెస్టుల్లో రాణించగలడని హర్భజన్ సింగ్ తాజాగా జోస్యం చెప్పాడు. ‘‘రోహిత్ శర్మ మంచి క్వాలిటీ ప్లేయర్. అతనిపై అంచనాలు కూడా భారీగానే ఉన్నాయి. గత ఏడాది భారత్ గడ్డపై టెస్టుల్లో పరుగుల వరద పారించినట్లే.. ఆస్ట్రేలియా గడ్డపైనా టెస్టు సిరీస్‌లో రాణిస్తాడని అభిమానులు గంపెడాశలతో ఉన్నారు. ఓపెనర్‌గా ఆడే రోహిత్ శర్మ.. ఒకవేళ ఫస్ట్ ఐదు ఓవర్లు క్రీజులో నిలవగలిగాడంటే..? ఆ తర్వాత అతడ్ని ఔట్ చేయడం లేదా నిలువరించడం ఆస్ట్రేలియా బౌలర్లకి కష్టమే. ఎందుకంటే క్రీజులో నిలిచిన తర్వాత అతని ఆట చాలా ప్రమాదకరంగా ఉంటుంది. బంతిని అతను చక్కగా ఫుల్ చేయగలడు. అలానే డ్రైవ్, బ్యాక్‌ఫుట్, కట్ షాట్స్‌ని అలవోకగా ఆడగలడు. కాబట్టి.. ఆస్ట్రేలియా గడ్డపై పరుగులు చేయడం అతనికేమీ కష్టం కాదు’’ అని హర్భజన్ సింగ్ చెప్పుకొచ్చాడు.

2019 వన్డే ప్రపంచకప్ ముందు వరకూ టెస్టుల్లో రెగ్యులర్ స్థానం దక్కించుకోలేకపోయిన రోహిత్ శర్మ.. మిడిలార్డర్‌లో ఆడుతూ కనిపించాడు. కానీ.. ఆ వరల్డ్‌కప్‌లో ఐదు శతకాలతో జోరందుకున్న ఈ హిట్‌మ్యాన్ ఆ తర్వాత దక్షిణాఫ్రికాతో టెస్టు సిరీస్‌లో ఓపెనర్‌గా ఆడి సెంచరీ, డబుల్ సెంచరీతో చెలరేగిపోయాడు. దాంతో.. ఇప్పుడు మూడు ఫార్మాట్లలోనూ అతను ఓపెనర్‌గా స్థిరపడిపోయాడు.