సిడ్నీ‌లో ఆస్ట్రేలియా 300కి ఆలౌట్.. భారత్ ఆధిక్యం 322

సిడ్నీ వేదికగా జరుగుతున్న నాలుగో టెస్టు మ్యాచ్‌లో భారత్ జట్టు విజయానికి బాటలు వేసుకుంది. ఆటలో నాలుగోరోజైన ఆదివారం ఓవర్‌నైట్ స్కోరు 236/6తో తొలి ఇన్నింగ్స్‌‌ని ఆస్ట్రేలియా జట్టు.. కుల్దీప్ యాదవ్ (5/99) ధాటికి 300 పరుగులకే కుప్పకూలిపోయింది. దీంతో.. భారత్‌కి 322 పరుగుల భారీ ఆధిక్యం లభించింది. శుక్రవారం చతేశ్వర్ పుజారా (193: 373 బంతుల్లో 22x4), రిషబ్ పంత్ (159 నాటౌట్: 189 బంతుల్లో 15x4, 1x6) శతకాలు బాదడంతో తొలి ఇన్నింగ్స్‌ని భారత్ 622/7తో డిక్లేర్ చేసిన విషయం తెలిసిందే. వర్షం కారణంగా ఈరోజు మూడు గంటలు ఆలస్యంగా ఆట ప్రారంభమైంది. నిన్న కూడా ఒక గంట మ్యాచ్ సమయం వృథా అయ్యింది.

ఈరోజు ఆట ప్రారంభమైన మూడు నిమిషాలకే భారత్ జట్టు వికెట్ పడగొట్టగలిగింది. శనివారం ఆఖరి సెషన్‌లో భారత బౌలర్లని ఇబ్బందిపెట్టిన పాట్ కమిన్స్ (25: 44 బంతుల్లో 6x4) జట్టు స్కోరు 236 వద్దే ఏడో వికెట్‌గా పెవిలియన్‌కి చేరాడు. ఆ తర్వాత వచ్చిన నాథన్ లయన్ (0) కుల్దీప్ బౌలింగ్‌లో డకౌటవగా.. హ్యాండ్స్‌కబ్ (37: 111 బంతుల్లో 5x4)‌ని బుమ్రా బోల్తా కొట్టించేశాడు. అయితే.. ఆఖర్లో మిచెల్ స్టార్క్ (29 నాటౌట్: 55 బంతుల్లో 3x4), హేజిల్‌వుడ్ (21: 45 బంతుల్లో 3x4) కాసేపు భారత బౌలర్ల సహనాన్ని పరీక్షించారు. వాస్తవానికి 265 పరుగుల వద్దే ఆస్ట్రేలియా ఆలౌటవ్వాల్సింది. కానీ.. హేజిల్‌వుడ్ ఇచ్చిన సులువైన క్యాచ్‌ని తడబాటులో ఫీల్డర్ హనుమ విహారి జారవిడిచాడు. ఆస్ట్రేలియా జట్టు‌లో ఓపెనర్ హారిస్ (79: 120 బంతుల్లో 8x4) మాత్రమే చెప్పుకోదగ్గ స్కోరు చేశాడు.