కుల్దీప్ బెస్ట్ స్పిన్నర్ అవుతాడు: షేన్‌వార్న్

ప్రపంచంలోనే అత్యుత్తమ స్పిన్నర్‌‌గా ఎదిగే నైపుణ్యం భారత జట్టు మణికట్టు స్పిన్నర్ కుల్దీప్ యాదవ్‌‌లో ఉందని ఆస్ట్రేలియా స్పిన్ దిగ్గజం షేన్‌వార్న్ అభిప్రాయపడ్డాడు. ఆస్ట్రేలియాతో జరుగుతున్న వన్డే సిరీస్‌లో పొదుపుగా బౌలింగ్ చేస్తున్న కుల్దీప్.. కీలక భాగస్వామ్యాలను విడదీస్తూ మ్యాచ్‌ల్ని మలుపు తిప్పుతున్నాడు. నాగ్‌పూర్ వేదికగా ఆదివారం జరుగుతున్న వన్డేలో కూడా తన కోటా 10 ఓవర్లు బౌలింగ్ చేసిన ఈ చైనామన్ బౌలర్ ఒక ఓవర్ మెయిడిన్‌గా వేసి.. 48 పరుగులు మాత్రమే ఇవ్వడం విశేషం.

‘కుల్దీప్ యాదవ్ అన్ని ఫార్మాట్లలో ఇంతే ఓపికగా బౌలింగ్ చేస్తే.. అతను ప్రస్తుతం మేటి స్పిన్నర్‌గా ఎదుగుతున్న యాసిర్‌ (పాకిస్థాన్)‌ను అధిగమించేస్తాడు. కొద్దిరోజులు ఆ జోరు కొనసాగించగలిగితే ప్రపంచంలోనే బెస్ట్ స్పిన్నర్‌గా ఎదుగుతాడు’ అని షేన్‌వార్న్ వివరించాడు. ఈ ఏడాది మార్చిలో ఆస్ట్రేలియాతో జరిగిన టెస్టు మ్యాచ్ ద్వారా టీమిండియాలోకి అరంగేట్రం చేసిన కుల్దీప్ యాదవ్.. మూడు ఫార్మాట్లలోనూ సుస్థిర స్థానం సంపాదించుకున్నాడు.