స్మిత్, మ్యాక్స్‌వెల్ బ్యాటింగ్ షో.. భారీ స్కోరు దిశగా ఆసీస్

రాంచీలో జరుగుతున్న మూడో టెస్టు తొలి రోజు ఆట ముగిసే సమయానికి ఆస్ట్రేలియా జట్టు నాలుగు వికెట్ల నష్టానికి 299 పరుగులు చేసింది. ఆసీస్ కెప్టెన్ స్టీవ్ స్మిత్ సెంచరీ (117 నాటౌట్) సాధించడంతో తొలి రోజు పర్యాటక జట్టు పై చేయి సాధించింది. ఈ సిరీస్‌లో స్మిత్‌కు ఇది రెండో సెంచరీ కాగా, ఓవరాల్‌గా టెస్టుల్లో 19వది కావడం గమనార్హం. టాస్ గెలిచిన ఆసీస్ ముందుగా బ్యాటింగ్ ఎంచుకుంది. 50 పరుగుల వద్ద వార్నర్ (19)ను ఔట్ చేసిన జడేజా వికెట్ల ఖాతా తెరిచాడు. తొలి సెషన్లో భారత బౌలర్లు రాణించడంతో ఆసీస్ 140 పరుగులకే నాలుగు వికెట్లు కోల్పోయి కష్టాల్లో పడింది.

ఈ దశలో క్రీజులోకి వచ్చిన మ్యాక్స్‌వెల్ స్మిత్‌కు చక్కటి సహకారం అందించాడు. రెండున్నరేళ్ల తర్వాత టెస్టు క్రికెట్ ఆడుతున్న గ్లేన్ ఈ అవకాశాన్ని చక్కగా వినియోగించుకున్నాడు. జడేజా బౌలింగ్‌లో సిక్సర్ బాదిన మ్యాక్స్‌వెల్ టెస్టుల్లో తొలి అర్ధ సెంచరీ సాధించాడు.

స్మిత్, మ్యాక్స్‌వెల్ (82 బ్యాటింగ్) జోడి ఐదో వికెట్‌కు అబేధ్యంగా 159 పరుగులు జోడించారు. ఈ సిరీస్‌లో ఇదే అతి పెద్ద భాగస్వామ్యం కావడం విశేషం. ఆరోస్థానంలో బ్యాటింగ్‌కు దిగి అత్యధిక పరుగులు చేసిన ఆసీస్ బ్యాట్స్‌మెన్‌గా మ్యాక్స్‌వెల్ రికార్డు నెలకొల్పాడు. టెస్టుల్లో వందకుపైగా బంతులను మ్యాక్స్‌వెల్ ఎదుర్కోవడం ఇదే ప్రథమం కావడం గమనార్హం.

బౌండరీ ఆపే క్రమంలో విరాట్ కుడి భుజానికి గాయమైంది. దీంతో అతడు డ్రెస్సింగ్ రూమ్‌కి వెళ్లి విశ్రాంతి తీసుకోగా.. అజింక్య రహానే కెప్టెన్‌గా వ్యవహరించాడు. తొలి రోజు భారత బౌలర్లలో ఉమేశ్ యాదవ్‌కు రెండు వికెట్లు దక్కగా.. అశ్విన్, జడేజా తలో వికెట్ తీశారు.

పుణేలో జరిగిన తొలి టెస్టులో పిచ్ పూర్తిగా బౌలర్లకు అనుకూలిస్తున్న సమయంలోనూ అద్భుతంగా రాణించిన స్మిత్ శతకం బాదిన సంగతి తెలిసిందే. ఈ మ్యాచ్‌లోనే స్మిత్ టెస్టుల్లో 5 వేల పరుగులు పూర్తి చేసుకున్నాడు. బ్రాడ్‌మ్యాన్‌ను మినహాయిస్తే.. 60కిపైగా యావరేజ్‌తో ఈ ఘనత సాధించిన తొలి బ్యాట్స్‌మెన్ స్మిత్ కావడం విశేషం. రాంచీలో సెంచరీతో స్మిత్.. మైక్ హస్సీ, మార్క్ టేలర్ సరసన నిలిచాడు.