కీపర్‌గా పంత్ అవమానకర స్టంపింగ్.. నోబాల్

భారత యువ వికెట్ కీపర్ రిషబ్ పంత్ వికెట్ల వెనుక తప్పిదాలపర్వం గురువారం రెండో టీ20లోనూ కొనసాగింది. బంగ్లాదేశ్‌తో రాజ్‌కోట్ వేదికగా జరిగిన మ్యాచ్‌లో ఓపెనర్ లిట్టన్ దాస్‌(29: 21 బంతుల్లో 4x4)ని స్టంపౌట్ చేసే క్రమంలో రిషబ్ పంత్ పెద్ద తప్పిదం చేశాడు. దీంతో.. బంతిని నోబాల్‌గా అంపైర్ ప్రకటించగా.. భారత్‌కి వికెట్ కూడా చేజారింది.

Read More: బంగ్లాపై రాజ్‌కోట్ టీ20తో రోహిత్ శర్మ @100

ఇన్నింగ్స్ 6వ ఓవర్ వేసిన చాహల్ బౌలింగ్‌లో ఓపెనర్ దాస్ క్రీజు వెలుపలికి వెళ్లి భారీ షాట్ ఆడేందుకు ప్రయత్నించాడు. అయితే.. బంతి అతని బ్యాట్‌కి అందకుండా వెనక్కి వెళ్లింది. దీంతో.. బంతిని ఒడిసిపట్టుకున్న పంత్ క్షణాల వ్యవధిలో వికెట్లని గీరాటేశాడు. కానీ.. రిప్లైని పరిశీలించిన అంపైర్ పంత్ తప్పిదం కారణంగా బంతిని నోబాల్‌గా ప్రకటించి బంగ్లాదేశ్‌కి ఫ్రీ హిట్ అవకాశం కల్పించాడు. దీంతో.. దాస్ వికెట్ పడిన ఆనందంలో ఉన్న భారత్‌కి నిరాశ ఎదురైంది.

undefined

ఇంతకీ పంత్ చేసిన తప్పిదం ఏంటంటే..? క్రికెట్ రూల్స్‌ ప్రకారం.. బ్యాట్‌‌మెన్‌‌ శరీరం లేదా బ్యాట్‌కి తాకని బంతి వికెట్లని దాటి వెనక్కి వచ్చిన తర్వాతే వికెట్ కీపర్ దాన్ని అందుకోవాలి. క్రీజు పరిధిలో ఉన్నప్పుడు కీపర్ దాన్ని పట్టుకోవడం నిబంధనలకి విరుద్ధం. ఇక్కడ రిషబ్ పంత్ చేసిన తప్పిదం ఇదే. దాస్‌కి అందని బంతి వికెట్లని దాటక ముందే పంత్ పట్టుకుని స్టంపౌట్ చేశాడు. దీంతో.. అంపైర్ నోబాల్‌గా ప్రకటించాడు. అయితే.. ఆ తర్వాత రెండు ఓవర్ల వ్యవధిలోనే తెలివిగా లిట్టన్ దాస్‌ని స్టంపౌట్ చేయడం ద్వారా పంత్ తన తప్పిదాన్ని దిద్దుకున్నాడు. అయితే.. కీపర్‌గా ప్రాథమిక నియమాన్ని ఉల్లఘించిన పంత్‌పై సోషల్ మీడియాలో అభిమానులు చురకలేస్తున్నారు.