Day Night Test DAY 1: బంగ్లాదేశ్ 106 ఆలౌట్.. భారత్ 174/3

భారత్, బంగ్లాదేశ్ మధ్య ఈడెన్ గార్డెన్స్ వేదికగా శుక్రవారం మొదలైన డే/నైట్ టెస్టులో తొలిరోజు ఆట ముగిసింది. మ్యాచ్‌లో టాస్ గెలిచి తొలుత బ్యాటింగ్ చేసిన బంగ్లాదేశ్ జట్టు 30.3 ఓవర్లలోనే 106 పరుగులకి మొదటి ఇన్నింగ్స్‌లో ఆలౌటవగా.. అనంతరం బ్యాటింగ్ ప్రారంభించిన టీమిండియా ఈరోజు మ్యాచ్‌ ముగిసే సమయానికి 46 ఓవర్లలో 174/3తో నిలిచింది. క్రీజులో కెప్టెన్ విరాట్ కోహ్లి ( 59 బ్యాటింగ్: 93 బంతుల్లో 8x4), వైస్ కెప్టెన్ అజింక్య రహానె (23 బ్యాటింగ్: 22 బంతుల్లో 3x4) ఉండగా.. భారత్ ఇప్పటికే 68 పరుగుల తొలి ఇన్నింగ్స్‌ ఆధిక్యంలో ఉంది.

undefined

ఇండోర్ టెస్టు తరహాలోనే ఈరోజు ఈడెన్‌ గార్డెన్స్‌లోనూ భారత ఫాస్ట్ బౌలర్లు చెలరేగిపోయారు. ఇషాంత్ శర్మ (5/22), ఉమేశ్ యాదవ్ (3/29), మహ్మద్ షమీ (2/36) కట్టుదిట్టమైన బౌలింగ్‌తో వరుసగా వికెట్లు పడగొట్టడంతో బంగ్లాదేశ్ బ్యాట్స్‌మెన్‌లు కనీసం క్రీజులో కూడా నిలవలేకపోయారు. ఎంతలా అంటే..? ఆ జట్టులో ఏకంగా నలుగురు బ్యాట్స్‌మెన్‌లు డకౌటవగా.. మొత్తంగా 9 మంది ఆటగాళ్లు సింగిల్ డిజిట్‌కే పరిమితమయ్యారు. ఓపెనర్ ఇస్లామ్ (29: 52 బంతుల్లో 5x4), లిట్టన్ దాస్ (24 రిటైర్డ్ హర్ట్: 27 బంతుల్లో 5x4) మాత్రమే ఫర్వాలేదనిపించారు.

Read More: విరాట్ కోహ్లీ ‘క్రీడా స్ఫూర్తి’.. బంగ్లాదేశ్ క్రికెటర్‌కి టీమిండియా ఫిజియో ట్రీట్‌మెంట్
బంగ్లాదేశ్ ఆలౌట్ తర్వాత భారత్ ఇన్నింగ్స్ ప్రారంభించిన ఓపెనర్లు మయాంక్ అగర్వాల్ (14: 21 బంతుల్లో 3x4), రోహిత్ శర్మ (21: 35 బంతుల్లో 2x4, 1x6) తక్కువ స్కోరుకే ఔటైపోయారు. అయితే.. అనంతరం వచ్చిన చతేశ్వర్ పుజారా (55: 105 బంతుల్లో 8x4)తో కలిసి భారత్ ఇన్నింగ్స్‌ని చక్కదిద్దిన కెప్టెన్ విరాట్ కోహ్లీ మూడో వికెట్‌కి 94 పరుగుల భాగస్వామ్యం నెలకొల్పాడు. అయితే.. హాఫ్ సెంచరీ తర్వాత పుజారా ఔటవగా.. రహానెతో కలిసి కోహ్లీ ఆఖరి సెషన్‌లో మరో వికెట్ పడకుండా జాగ్రత్తగా ఆడాడు. గులాబీ రంగు బంతితో డే/నైట్ టెస్టు మ్యాచ్ ఆడుతుండటం ఈ రెండు జట్లకీ ఇదే తొలిసారి.

Read More: షమీ బౌన్సర్ల దెబ్బ.. ఈడెన్ టెస్టులో బంగ్లాదేశ్‌కి ఇద్దరు కాంకషన్ సబ్‌స్టిట్యూట్స్