డీఆర్ఎస్: ముష్ఫికర్ ఫట్.. కోహ్లి హిట్

బంగ్లాదేశ్‌తో జరుగుతున్న ఏకైక టెస్టు మ్యాచ్‌లో డీఆర్ఎస్ మరోసారి వార్తల్లో నిలిచింది. తొలి రోజు కోహ్లిని అవుట్ కాకున్నా డీఆర్ఎస్ కోరి మరీ బంగ్లాదేశ్ కెప్టెన్ కమ్ కీపర్ ముష్ఫికర్ రహీం నవ్వులపాలు కాగా... రెండో రోజు కోహ్లి రివ్యూ కోరడంతో టీమిండియాకు వికెట్ దక్కింది. 688 పరుగుల భారీ లక్ష్యంతో తొలి ఇన్నింగ్స్ ప్రారంభించిన బంగ్లా జట్టుకు ఓపెనర్లు శుభారంభం అందించే ప్రయత్నం చేశారు. జట్టు స్కోరు 38 పరుగుల వద్ద సౌమ్య సర్కారు అవుటయ్యాడు.

ఉమేశ్ యాదవ్ విసిరిన బంతిని షాట్ ఆడే క్రమంలో సౌమ్య అంచనా తప్పడంతో బంతి బ్యాట్ లోపలి అంచును తాకుతూ కీపర్ సాహా చేతుల్లో పడింది. ముందుగా అంపైర్ నాటౌట్ ఇవ్వగా.. కెప్టెన్ కోహ్లి రివ్యూ కోరాడు. రిప్లయ్‌లో బంతి బ్యాట్‌ను తాకినట్లు స్పష్టంగా తేలడంతో.. కోహ్లి కాన్ఫిడెన్స్ కారణంగా ఉమేశ్ యాదవ్ ఖాతాలో వికెట్ చేరింది.


కోహ్లిని వీలైనంత త్వరగా అవుట్ చేయాలనే ఉద్దేశంలో ఉన్న బంగ్లా కెప్టెన్ ముష్ఫికర్.. ఓ అనవసర రివ్యూ కోరి నవ్వులపాలైన సంగతి తెలిసిందే. బంతి క్లియర్‌గా కోహ్లి బ్యాట్‌ను తాకినప్పటికీ.. ఎల్బీ కోసం ముష్ఫికర్ అపీల్ చేశాడు. అంపైర్ నాటౌట్ ఇవ్వడంతో రివ్యూ కోరి భంగపడ్డాడు. ముష్ఫికర్ రివ్యూ కోరడంతో విరాట్ నవ్వుకోగా.. బంగ్లా ఆటగాళ్లు మాత్రం ఆశ్చర్యానికి గురయ్యారు.

రెండో రోజు ముష్ఫికర్ సాహాను స్టంపౌట్ చేసే అవకాశాన్ని కోల్పోయిన సంగతి తెలిసిందే. బంగ్లా కెప్టెన్ లైఫ్ ఇవ్వడంతో బతికిపోయిన సాహా.. టెస్టు కెరీర్లో రెండో సెంచరీ సాధించాడు.