గవాస్కర్‌ను దాటేసిన విరాట్ కోహ్లి

భారత కెప్టెన్ విరాట్ కోహ్లి తన విజయ పరంపరను కొనసాగిస్తున్నాడు. టెస్టుల్లో వరుస విజయాలతో రికార్డులు తిరగరాస్తున్నాడు. వరసగా అత్యధిక టెస్టుల్లో పరాజయమే లేని భారత కెప్టెన్‌గా విరాట్ కోహ్లి నిలిచాడు. విరాట్ కెప్టెన్‌గా 23 టెస్టులు ఆడిన టీం ఇండియా వరసగా 15 టెస్టుల్లో విజయం సాధించగా.. 4 టెస్టులను డ్రా చేసుకుంది. దీంతో దిగ్గజ కెప్టెన్ సునీల్ గవాస్కర్ పేరిట ఉన్న రికార్డును కోహ్లి తిరగరాశాడు. సునీల్ గవాస్కర్ సారథ్యంలోని భారత జట్టు గతంలో వరసగా 18 టెస్టుల్లో 6 విజయాలు సాధించగా.. 12 మ్యాచ్‌లను డ్రా చేసుకుంది. హైదరాబాద్‌ టెస్టులో టీం ఇండియా విజయం సాధించడంతో విరాట్ కోహ్లి.. వరసగా 19 టెస్టుల్లో అపజయాలే లేని కెప్టెన్‌గా గవాస్కర్‌ను దాటేసాడు.

అలాగే అత్యధిక టెస్టుల్లో విజయం సాధించిన భారత కెప్టెన్ల జాబితాలో విరాట్ మూడో స్థానంలో ఉన్నాడు. మహేంద్ర సింగ్ ధోనీ, సౌరవ్ గంగూలీ తరవాత కోహ్లి నిలిచాడు. అయితే తొలి 23 టెస్టుల్లో అత్యధిక విజయాలు సాధించన కెప్టెన్ మాత్రం కోహ్లినే. కోహ్లి సారథ్యంలోని టీం ఇండియా 23 టెస్టుల్లో 15 విజయాలు, 2 అపజయాలు, 6 డ్రాలు ఉన్నాయి. 14 విజయాలతో ధోనీ రెండో స్థానంలో ఉండగా.. 10 విజయాలతో సౌరవ్ గంగూలీ మూడో స్థానంలో ఉన్నాడు.

బ్యాట్స్‌మన్‌గా కూడా విరాట్ కొత్త రికార్డు నెలకొల్పాడు. వరుస టెస్టుల్లో తొలి ఇన్నింగ్స్‌లో నాలుగు డబుల్ సెంచరీలు సాధించిన ప్రపంచంలోనే తొలి బ్యాట్స్‌మన్‌గా కోహ్లి చరిత్రకెక్కాడు.