కెప్టెన్‌గా ధోనీ నుంచి నేను కోరుకునేది అదే: కోహ్లి

రానున్న మ్యాచ్‌ల్లో మహేంద్ర సింగ్ ధోని నుంచి సలహాలు స్వీకరిస్తానని పరిమిత ఓవర్ల కొత్త కెప్టెన్ విరాట్ కోహ్లి స్పష్టం చేశాడు. మహీ గొప్ప కెప్టెన్ అని, అతడి అమూల్యమైన సలహాలను స్వీకరిస్తానని కోహ్లి తెలిపాడు. ఇప్పుడు నేను నిర్ణయాలు తీసుకుంటాను. మహీ భాయ్ తన అభిప్రాయం చెప్తాడు. ఇలాంటి ప్రక్రియే మా మధ్య గతంలోనూ జరిగింది. మేమిద్దరం ప్రొఫెషనల్ క్రికెటర్లం కాబట్టి నాయకత్వ మార్పిడి ప్రక్రియ సజావుగానే జరుగుతుందని విరాట్ మీడియా సమావేశంలో తెలిపాడు.

ధోనీ కెప్టెన్‌గా ఉన్నప్పుడు నేను తరచుగా నా అభిప్రాయాలను, ఆలోచనలను అతడితో పంచుకునేవాడిని. పరిస్థితులను బట్టి అతడు నిర్ణయాలు తీసుకునేవాడు. కొన్నిసార్లు నా సలహాలను మహీ భాయ్ వెంటనే అమలు చేసేవాడు. కొన్నిసార్లు ఆలస్యమయ్యేది. నేను చెప్పిన విషయాన్ని రెండో ఆప్షన్‌గా ఉంచుకునేవాడు. క్రికెట్ పట్ల, కెప్టెన్సీ పట్ల ఒక్కో ఆటగాడికి ఒక్కో దృక్పథం ఉంటుంది. ఇది చాలా సహజమైన విషయం అని కోహ్లి చెప్పాడు.

ధోనీ సలహాలు అమూల్యమైనవి. అతడి సలహాలను మనసులో ఉంచుకుంటాను. కాకపోతే నా తరహాలో నేను సన్నద్ధం అవుతా. నా ఆత్మ బలాన్నే కాస్త ఎక్కువగా నమ్ముతా. ఆ తర్వాత అవసరమైతే ప్రత్యామ్నాయాన్ని అనుసరిస్తా అని కోహ్లి చెప్పుకొచ్చాడు. పూర్తిస్థాయి కెప్టెన్ బాధ్యతలు ఎలా ఉండనున్నాయి అని ప్రశ్నిస్తే.. ఇప్పటికే దాదాపు రెండేళ్లుగా టెస్టు జట్టు కెప్టెన్‌గా వ్యవహరిస్తున్నా. సోమవారం ఇంగ్లండ్‌తో తొలివన్డే సందర్భంగా టాస్ కోసం వెళ్లాల్సి ఉంటుంది. అంతకు మించి పెద్ద మార్పేమీ ఉండబోదు అని విరాట్ చెప్పాడు.

ధోనీ నుంచి ఇప్పటికే చాలా నేర్చుకున్నా. అతడో విజయవంతమైన కెప్టెన్. మహీ భాయ్ అన్నింటి మధ్య బ్యాలెన్సింగ్‌గా ఉండేవాడు. ఆటను అర్థం చేసుకోవడం, ప్రత్యర్థి ఆధిక్యం సాధించినప్పుడు అతడు అనుసరించే వ్యూహాలు, ఆట ప్రణాళికలే అతడి విజయానికి ముఖ్య కారణం.

ఇప్పుడు ధోనీపై కెప్టెన్సీ భారం లేదు కాబట్టి 2004లో భారత జట్టులో చేరినప్పుడు అతడు ఎలా ఆడాడో అదే స్థాయిలో ఇప్పుడు మళ్లీ ఆడగలడు. ఓ బ్యాట్స్‌మెన్‌గా ప్రమాదకరంగా మారగలడనే ఆశాభావాన్ని కోహ్లి వ్యక్తం చేశాడు. అతడు క్యాలెక్యులేటివ్‌గా ఉంటాడు. జట్టు పరిస్థితిని అర్థం చేసుకుంటాడు. నేను ఇప్పుడు మరిన్ని బాధ్యతలను తీసుకుంటున్నాను కాబట్టి ధోనీ మరింత ఎక్స్‌ప్రెసివ్‌గా ఉండాలని అనుకుంటున్నా. దీనర్థం క్రీజులోకి వెళ్లినప్పటి నుంచే ప్రతి బంతినీ బాదాలని కాదు. అతడో స్మార్ట్ క్రికెటర్. ఈ విషయం మనకు ఇప్పటికే తెలుసు అని కోహ్లి ధోనీపై ప్రశంసలు కురిపించాడు.

ఇక యువీ మిడిల్ ఓవర్లలో బ్యాటింగ్‌కు వస్తాడు. వీరిద్దరూ ఇప్పటికే మిడిలార్డర్లో విజయవంతమయ్యారు. ఒకరొకరు సహకరించుకుంటూ పరుగులు రాబడతారు. ఒకరు విరుచుకుపడుతుంటే మరొకరు సింగిల్స్ తీస్తూ సహకారం అందించుకోగలరు.. అని యువీ-ధోనీ జోడీ గురించి కోహ్లి తన అభిప్రాయాన్ని తెలిపాడు. జూన్లో మొదలు కానున్న ఛాంపియన్స్ ట్రోఫీకి సన్నద్ధం కావడానికి ఇంగ్లండ్‌తో సిరీస్ ఉపయోగపడుతుందని కోహ్లి చెప్పుకొచ్చాడు. ఇంగ్లండ్‌తో మూడు మ్యాచ్‌లను నాకౌట్ మ్యాచుల్లాగే పరిగణిస్తామని కోహ్లి చెప్పాడు.