విరాట్ కోహ్లి ‘గ్లోబల్ సూపర్ స్టార్’: స్టీవ్‌వా

ఇంగ్లాండ్‌తో జరుగుతున్న తొలి టెస్టులో అసాధారణ ఆటతీరు కనబర్చిన విరాట్ కోహ్లిపై ప్రశంసల జల్లు కొనసాగుతోంది. ఇప్పటికే ప్రపంచ వ్యాప్తంగా క్రికెట్ దిగ్గజాలు ఈ భారత కెప్టెన్‌ ఆటకి ముగ్ధులవగా.. తాజాగా ఆ జాబితాలో ఆస్ట్రేలియా మాజీ కెప్టెన్ స్టీవ్‌వా చేరాడు.

బర్మింగ్‌హామ్ వేదికగా జరుగుతున్న తొలి టెస్టులో భారత టాప్ ఆర్డర్ బ్యాట్స్‌మెన్‌ చేతులెత్తేసినవేళ బాధ్యతాయుత ఇన్నింగ్స్ ఆడిన కోహ్లి తొలి ఇన్నింగ్స్‌లో భారీ శతకం జట్టుని ఆదుకున్నాడు. అనంతరం రెండో ఇన్నింగ్స్‌లోనూ అగ్రశ్రేణి బ్యాట్స్‌మెన్లు ఫెయిలవడంతో.. మరోసారి ఈ కెప్టెన్ భారత జట్టుని గెలిపించే బాధ్యతను భుజాన వేసుకుని ఒంటరి పోరాటం చేస్తున్నాడు.

ఇంగ్లాండ్ గడ్డపై కోహ్లి ఆటతీరుకి ఫిదా అయిన స్టీవ్‌వా సోషల్ మీడియాలో ప్రశంసిస్తూ గ్లోబల్ సూపర్ స్టార్‌గా అభివర్ణించాడు. ‘విరాట్ కోహ్లి గ్లోబల్ సూపర్ స్టార్. క్రికెట్ ప్రపంచంలోని అన్ని రికార్డులను అతను బద్ధలుకొడతాడు’ అని స్టీవ్‌వా రాసుకొచ్చాడు.