IND vs IRE సెకండ్ టీ20కి పొంచి ఉన్న వర్షం ముప్పు.. కానీ?

భారత్, ఐర్లాండ్ మధ్య మంగళవారం రాత్రి జరగనున్న రెండో టీ20 మ్యాచ్‌కి వర్షం ముప్పు పొంచి ఉంది. గత ఆదివారం రాత్రి డబ్లిన్ వేదికగా జరిగిన తొలి టీ20కి వర్షం రెండు సార్లు అంతరాయం కలిగించగా.. మ్యాచ్‌ని 12 ఓవర్లకి కుదించి ఆడించారు. ఈ మ్యాచ్‌లో టాస్ గెలిచిన భారత్ జట్టు ఛేదనకు దిగి 7 వికెట్ల తేడాతో అలవోక విజయాన్ని అందుకుంది. అయితే.. ఈరోజు రాత్రి 9 గంటలకి ఆ డబ్లిన్‌లోనే రెండో టీ20 మ్యాచ్ జరగబోతుండగా.. ఈరోజు కూడా వర్షం పడే సూచనలు కనిపిస్తున్నాయి. దాంతో.. ఇరు జట్లలో కంగారు మొదలైంది. డబ్లిన్ పరిసరాల్లో గత కొన్ని రోజుల నుంచి వర్షాలు పడుతున్నాయి. ఈరోజు కూడా వర్షం పడే అవకాశమున్నట్లు వాతావరణ శాఖ తెలిపింది. కానీ.. ఊరటనిచ్చే విషయం ఏంటంటే? మ్యాచ్ జరిగే సమయంలో వర్షం పడే సూచనలు తక్కువగా ఉండటమే. అక్కడి కాలమాన ప్రకారం సాయంత్రం 4:30 గంటలకి మ్యాచ్ ప్రారంభంకానుంది. అయితే.. సాయంత్రం 4 నుంచి 7 గంటల వరకూ అక్కడ వర్షం పడే సూచనలు కేవలం 10% మాత్రమే. కానీ.. 7 నుంచి 8 గంటల మధ్య చిరుజల్లు కురిసే అవకాశం ఉందని వార్తలు వస్తున్నాయి. ఆ గంట వ్యవధిలో వర్షం పడే అవకాశం 22% ఉందట. కానీ.. అక్కడ నిమిషాల్లోనే వాతావరణ పరిస్థితులు మారిపోతుంటాయి.

ఈరోజు రెండో టీ20లో టాస్ గెలిచిన టీమ్ కచ్చితంగా ఛేదనకే మొగ్గు చూపుతుంది. వర్షం కారణంగా మ్యాచ్‌లో ఓవర్లు కుదిస్తే? అప్పుడు సెకండ్ బ్యాటింగ్ చేసే టీమ్‌కి లబ్ది చేకూరనుంది. తొలి టీ20లో ఫస్ట్ బ్యాటింగ్ చేసిన ఐర్లాండ్ టీమ్ 12 ఓవర్లలో 4 వికెట్ల నష్టానికి 108 పరుగులు చేయగా.. లక్ష్యాన్ని 9.2 ఓవర్లలోనే భారత్ జట్టు 111/3తో ఛేదించేసింది. ఈరోజు మ్యాచ్‌తో ఐర్లాండ్ గడ్డపై భారత్ టీ20 జట్టు పర్యటన కూడా ముగియనుంది.