IND vs IRE హెడ్ టు హెడ్ రికార్డులు.. టీ20ల్లో పసికూనే కానీ?

ఐర్లాండ్‌ గడ్డపై పర్యటిస్తున్న భారత టీ20 జట్టు ఈరోజు నుంచి ఆ జట్టుతో రెండు టీ20ల సిరీస్‌ని ఆడబోతోంది. ఈ రెండు మ్యాచ్‌లకి డబ్లిన్ స్టేడియం ఆతిథ్యం ఇవ్వబోతుండగా.. రెండు మ్యాచ్‌లు భారత కాలమాన ప్రకారం రాత్రి 9 గంటలకి ప్రారంభంకానున్నాయి. టీమిండియా దాదాపు నాలుగేళ్ల తర్వాత డబ్లిన్‌లో మళ్లీ టీ20 మ్యాచ్‌లు ఆడబోతోంది. భారత్, ఐర్లాండ్ మధ్య టీ20ల్లో హెడ్ టు హెడ్ రికార్డుల్ని ఓసారి పరిశీలిస్తే? ఇప్పటి వరకూ ఈ రెండు జట్లు మూడు టీ20ల్లో తలపడగా.. మూడింటిలోనూ టీమిండియానే విజయం సాధించింది. చివరిగా 2018లో డబ్లిన్ వేదికగా జరిగిన టీ20 మ్యాచ్‌లో భారత్ జట్టు ఏకంగా 143 పరుగుల తేడాతో గెలుపొందింది. కానీ.. ఇటీవలకాలంలో ఐర్లాండ్ టీమ్‌ కూడా టీ20ల్లో మెరుగైంది. ఆ జట్టులోని కొంత మంది ఆటగాళ్లు ప్రపంచవ్యాప్తంగా జరుగుతున్న ప్రైవేట్ టీ20 లీగ్స్‌లో ఆడి మెరిశారు. దాంతో.. ఏమరపాటుగా ఆడితే టీమిండియా మూల్యం చెల్లించుకోక తప్పదని మాజీ క్రికెటర్లు హెచ్చరిస్తున్నారు.

భారత టెస్టు టీమ్ ప్రస్తుతం ఇంగ్లాండ్‌లో పర్యటిస్తుండటంతో.. యువ ఆటగాళ్లతో నిండిన టీ20 జట్టు అక్కడికి వెళ్లింది. ఈ టీమ్‌కి కెప్టెన్‌గా హార్దిక్ పాండ్య వ్యవహరిస్తుండగా.. అతనితో పాటు దినేశ్ కార్తీక్, భువనేశ్వర్ కుమార్, చాహల్ మాత్రమే సీనియర్ ప్లేయర్లు. మిగిలిన ఆటగాళ్లంతా అంతర్జాతీయ క్రికెట్‌లో నిరూపించుకునేందుకు ప్రయత్నిస్తున్నావారే.